وقال البوزيدي:" الستاغ هي اللي تعطي التقديرات متاعها في ميزانية الدولة، والدولة هي اللي تقول كيفاش تعملو هذيا وكيفاش تعملو هاذي.. يعني الستاغ ليس لها لا ناقة ولا بعير في الحكاية هاذي... تعطي شنوة يلزمها من الدعم، كيما تعرفوا الفاتورة مدعومة من الدولة، مش السعر اللي ننتجو بيه هو اللي نبيعوا بيه للمواطن، عنا المواطن يدفع شي والدولة تدفع شي، الدولة تقلك في الدعم هذاكا، تقلك امشي زيد في فاتورة الكهرباء وأعطينا سيناريوهات برشا بش الطبقة العادية والفقيرة ما يوصلهمش الزيادة هاذي وتكون الزيادة موجهة... المفروض الستاغ هي اللي تعلم بالزيادة وتقوم بالواجب متاعها على أتم وجه من شهر فيفري وهي تقول فما زيادة في فاتورة الكهرباء والغاز.
وأضاف الكاتب العام المساعد للجامعة العامة للكهرباء والغاز أن 85 بالمائة من الحرفاء ليسوا معنيين بالزيادة الأخيرة في فاتورة الاستهلاك، قائلا:" 200 كيلو وات ينجموا يستعملو عادي حاسوب تلفزة، عادي مش يعيشوا على ضو الحاكم.. يلزم نقولو الجامعة العامة للكهرباء والغاز ضد الزيادة في تعريفة الكهرباء والغاز للمواطن، لأنو هي تحب ولا تكره الستاغ هي مؤسسة اجتماعية ترعى الطبقة الفقيرة والطبقة المتوسطة، هو توة كي صارت التعريفة، الكوادر والإطارات في الشركة حبو يمنعو أكثر ما يمكن من الناس اللي تستهلك في الضو أقل من 200 كيلو وات".
كما أشار ضيف برنامج في 90 دقيقة إلى أن التيار الكهربائي قد ينقطع في تونس إذا تواصلت الوضعية مثلما هي عليه حاليا:" بالوضعية هاذي أولا الدولة ما توفيش بالتزاماتها نحو الشركة في إعطائها زيادة الدعم متاعها وما انجموش نقعدوا لتعديل الميزانية في سبتمبر يلزم تعديل الميزانية يكون حاليا وتدخل الدولة في مستوى الدعم متاعها والتزامات الشركة نحو مزوديها... راهو اذا كان يبقى الحال على ماهو عليه توة تضطر الستاغ ما عندهاش حل آخر إلا أنها تقص الضو... توة الـ1600 مليار مازلنا ما خذيناش خذينا كان 100 مليار، ومازال توقعاتنا متاع الـ10 آلاف و100 مليار... إذا بش نقعدوا هكا الضو بش يولي بالوقت، وممكن الشركة تولي تقص الضو حسب القطاعات ، بش ما نخليوش القطاعات الكل يتقص عليهم الضو برشا وقت ... تدخل الدولة يلزم يكون فوري وحالا لحلحة الأمور هاذي وتكون الدولة متحملة مسؤولياتها في أنها تدعم الشركة ماديا وحتى سياسيا لحلحلة الأمور هاذي، بطبيعة الحال لا ننسا المواطن في استهلاكو للكهرباء والغاز لتقليص الإنتاج شوية عالستاغ"...