وقال الكحلاوي:" بطبيعة الحال عنا سياق مش فقط لقاء بين رئيس الجمهورية ورئيس منظمة الأعراف... عنا سياق حديث الاتحاد التونسي للشعل على مبادرة فيه مجموعة من المنظمات ناس تحكي على ثلاثي في عوض الرباعي، شنوة ناقصو الثلاثي هو الضلع الرابع هو منظمة الأعراف، أحنا قلنا المرة اللي فاتت الجملة الشهيرة أما هي عندها معنى من الناحية التاريخية ومن ناحية التجربة، اللي هي رأس المال مش بالضرورة شجاع بش ما نقولش كلمة أخرى، يخاف مالسياق يأخذ بعين الاعتبار التوازنات، يحسب يقيس، إذا كان بش يدخل للسياسة يقيس قبل ما يغيص، يأخذ وقتو، وبالتالي الوضع بالنسبة لرجال الأعمال أكيد صعيب من الناحية الاقتصادية والرئيس يعتبر موضوع الاحتكار هو بالأساس مؤامراتي إذن فيه ناس في غرف مظلمة إذن فما رجال أعمال في غرف مظلمة، وطارح في نفس الوقت موضوع الصلح الجزائي اللي يستهدف فيه جزء من رجال الأعمال، يعني كاينو فما نوعا ما ضغط أو شبه صراع بين الرئيس وفئة رجال الأعمال عموما، لكن الصراع هذا مش واصل بشكل مفتوح، وبالتالي لهنا ربما هو قاعد يستميل في منظمة الأعراف، قاعد يقلهم عنا ما نحكيو راهو ما فماش عركة مفتوحة بيناتنا، مش لازم تردوه رباعي خليوه ثلاثي وكان حبو يردوه رباعي وخماسي وسداسي ما تكونوش انتوما فيه، راهو ما بيناتناش عركة، راهو ربما عندكم فكرة غالطة عليا، هو ربما عزل الأوتيكا عالاتحاد، لكن أنا في اعتقادي اللي محاولة الاستمالة هاذيا مفهومة من زاوية السياسة، ولهنا بين قوسين انجمو نفهمو اللي قيس سعيد مش صحيح ما يعملش السياسة يحب يعمل السياسة بطريقتو، يتكتك، يجيب شوية الاوتيكا يحب يبعدها ويحيدها عن مبادرة الثلاثي، لكن هذا ما يعنيش اللي بالضرورة الأوتيكا ماهمش مهتمين بالفكرة إنو يكونو في مبادرة سياسية، هذا بش تحسمو طبيعة موازين القوى، قدرة قيس سعيد على ضبط الأمور ومسألة منين يجيب التمويلات، هل عندو خطة بديلة إذا كان ما عندوش صندوق النقد، هل إذا كان عندو صندوق النقد شنوة التمويلات اللي بش يجيبها، في اللخر يعني كيف رأس المال ماهوش شجاع زادة يمشي مع موازين القوى، يعني اللقاء هذا مش هو بش يحسم، ولا محاولة استمالة قيس سعيد للأوتيكا، هو اللي بش يحسم موقف رجال الأعمال اللي يبدو اللي هوما مش على قلب رجل واحد، سمير ماجول عندو مدة مختفي فما شكون يتحدث ربما على إمكانية وجود ملف قضائي، لكن اللي بش يحسم في النهاية هو موازين القوى ويحسبو مليح رجال الأعمال في خصوص موازين القوى".