وقال الكحلاوي:" فما صفحات يقال إنها قريبة مالدعداع، فما تدوينات سبقت التسجيل قالوا أيا هانا جايين لعركة وبش نبداو نفضحوا في الأشياء، أهم شهادة في علاقة بمختلف القضايا المتعلقة بحركة النهضة، هي شهادة عادل الدعداع، لأنو أي واحد يعرف أنو هو من خاصة الخاصة من الحلقة المضيقة حول رئيس حركة النهضة، وتذكروا وقتلي عمل الإفادة متاعو لقاضي التحقيق، طلب أنو حتى المحامي متاعو ما يبداش حاضر، وفي التسجيل هذا الجزء الثاني كان مهم، هو الموضوع المالي وذكر بالاسم أمين السر المالي وذكر بالتفصيل كيفاش كانت تجي الفلوس، يعني لهنا عندك كيما يتقال في قضية الحريري، الشاهد الملك، طبعا ما يكفيش اللي يقولو، لكن شهادتو مهمة... ولفت انتباهي في الندوة الصحفية اللي عملتها حركة النهضة للرد على مختلف القضايا هاذيا أنو لم يتم عمليا نفي أنو هذاكا صوتو، ولكن لم يتم الرد على المعطيات اللي هي بيها الفايدة، اللي تخص كيفاش كانت تجي الفلوس كيفاش تمشي لأحد القنوات التلفزية، شكون العايلات اللي شكلت تحالف بش شرات القناة التلفزية هاذيكا، معطيات تفصيلية اللي هي يبدو جزء فقط ماللي قالو في الإحالة متاعو، يعني هروبو هو وبعث التسريب هذا فيه رسالة لحركة النهضة يا إما تتدخلو بش تفضولي أموري، ما تدخلتوش وقتلي صاحبكم الباجي قايد السبسي وتعرضت لمشاكل ضريبية وانتوما تتفرجوا، توة المسألة أخطر مرتي وعايلتي في الحبس، وأنا مهدد بالحبس وأنا مستعد بش نفضح كل شي إذا ما تتدخلوش في أي مفاوضات ممكنة تكون حول الوضعية متاعكم، بالعربي إذا كان بش تلقاو حل لرواحكم انتوما تفاهموا على وضعي"..