وقال الكحلاوي:" رئيس الجمهورية هذا أول طهور ليه بعد اللغط اللي صار حول المسألة الصحية، إنو متواجد ويمشي ويتحرك بشكل عادي، دليل اللي الأزمة الصحية اللي كان هو بيدو أقر بيها، ما كانتش بالخطورة اللي قالو عليها البعض، خاطر كان كانت بالخطورة وإنعاش وإلى آخره ما نتصورش أنو يقدر يمشي ويتحرك بالشكل هذاكا، هاذي النقطة اللولانية، وهذا بغض النظر عن معارضة ومساندة قيس سعيد مهم للدولة إنو الشخص اللي على رأسها توة وقرر أنو ياخو كل الصلاحيات أنو يكون في صحة مقبولة، النقطة الثانية مالمرات القليلة اللي سمعنا تفاعل بين الرئيس والصحفيين، واللي سألوه الصحفيين بالنسبة ليا أهم ماللي قالوا ماللول لأنو مسوا نقاط اللي عليها جدل حقيقي وتستوجب إجابات من الرئيس، بعضها جاوب عليها بعد تكرار وإصرار من الصحفيين، وبعضها تجاهلها اللي تجاهلو المحكمة الدستورية مثلا، في المقابل حكى على موضوع الجانب الاقتصادي والاجتماعي اللي جبدت عليه وسألوه بشكل محدد هل بش تصحح على اتفاق صندوق النقد الدولي وإلا لا، واليوم وهذا خبر واضح ومهم جدا للأطراف الدولية ومؤسسات التمويل الدولية، عنا إجابة رسمية وواضحة من رئيس الدولة ولا غبار عليها ولا تستحق تأويل ولا تفسيرات ولا تفسير المقاصد ولا حتى شي، الرئيس قال لن أوقع على الاتفاق كما ورد في اتفاق الخبراء، وركز بشكل خاص على موضوع الدعم.. والسلم الأهلي هو المحرار مش ما تمليه علينا الأطراف الدولية... الحفاظ الأمني بالنسبة للرئيس يمنع على اتفاق بالشكل هذا بشكل إملاءات، وهذا معطى مهم جدا وتسأل من الصحفيين، شنوما البدائل اللي عندك سيدي الرئيس؟، ولهنا الرئيس قال أعطيونا الأموال المنهوبة، نعملو على رواحنا، خلي نكونوا واضحين، الرئيس صعيب برشا ما يعرفش اللي ما عندوش خزنة مخبية في البلاد واللي الأموال المنهوبة ماهيش رهن إشارة لعدة أـسباب تقنية وسياسية.. أنو البديل على صندوق النقد الدولي توة إلى حد الآن ما عندوش، الأموال المنهوبة عند البنوك متاع البرة، نعملو على رواحنا إي نعملو على رواحنا أما هاذي تتطلب أفق استراتيجي مش متاع عام تتطلب متاع 5 و10 سنوات ومهم أنو نبنيو الشي هذا.. لكن نحكيو على العام هذا توة، الرئيس عمليا قاللنا ما عندوش بديل، وأنا يظهرلي الخطة ب هي اللي قلناها المرة اللي فاتت، هو أنو الرئيس قاعد يْصَعَدْ، لا نوصلو لحافة الهاوية.. أنا بالنسبة ليا واضح الآن، أنو الرئيس ماشي لحافة الهاوية، ووزير الخارجية تقريبا قال الكلام هذاايا في الحوار مع صحيفة لا ريبوبليكا الإيطالية"...