وقال الكحلاوي:" حلقة أخرى مرة أخرى، الرئيس قاعد وحدو كتب نص ما ينجم يوحلها في راس حتى حد، تقالو أكثر من مرة بعد ما خرج القانون الانتخابي، وقلناها لهنا أكثر من مرة، راهو القانون هذا يخلق ظروف متاع فساد سياسي كي تمنع التمويل العمومي من شيرة وتهزها لـ400 تزكية من شيرة أخرى، ومعرفة بالإمضاء زادة، تخلق ظروف متاع فساد سياسي، مبعد هو توة جاء قاللنا كاينو حد آخر كتب القانون، كي تشوف البلاغ كاينو جماعة الايزي هوما اللي كتبو القانون وهو جاء قالهم شنوة القانون هذا توة هذا قانون، يجي منو توة هكايا، فماش مرة على الأقل يقول، أنا ربما غلطت ربما راهو صارت إشكالات وما كنتش قاري حساب الحاجة هاذيا ربما لأنو واحد وحدو ما ينجمش يفهم في كل شي ويكتب في كل شيم المفروض يسمع الناس... في الأصل في المبدأ بشكل نظري والله حاجة باهية يقول واحد إذا كان التشريع الحالي، أما انت عملتو التشريع الحالي، وعلاش هو زعما طلع هكا مش على خاطرك انت وحدك وما تسمع كان روحك وما تسمعش الناس، تي حتى الايزي اللي ماشية معاه في الخط على طول قالولو مش 400 أهبط لـ200 وقالوها علنا، قالو قلنا للرئيس ياسر 400 وما سمعهمش، ثما النقطة اثنين توة كنا نسمعو فيهم كيفنا كيفهم، قالك أحنا هانا قاعدين نستناو كان بش تجينا حاجة فبها، ياخي مش مالمفروض يحتجو حتى بأبسط العبارات راهو ما يجيش، يا رئيس الجمهورية راهو عملتو وحدك القانون ما يجيش تعمللنا هكطا على الأقل عيطلنا المرة هاذي، على الأقل في التنقيح توة عيطلهم أحكي معاهم أسمعهم، ناس عدات أكثر من انتخابات عيط للأطراف المختلفة اللي تعدات بأكثر من انتخابات، منظمات المجتمع المدني مراقبون عتيد، إلى آخره، اللي عداو درا قداش من انتخابات، مش مالمفروض تعيطلهم مش سبب الغلطة المرة اللي فاتت إنك عملتو وحدك على الأقل توة عيط للناس أسمعهم كي بش تنقح".