وقال الكحلاوي :" يقصد فما مجالات دور الدولة فيها ضروري وما يتحسبش بالربح والخسارة، بمعنى أنو فما مجالات وذكرهم هو في الرسالة اللي حملها لبودن، التعليم النقل الصحة، أنو فما أشياء ما يلزمش يكون دور الدولة فيها بمنطق الربح والخسارة، إذا كان تخسر الدولة ومصاريفها تكون أكثر من مداخيلها، إذا كان تنجم تصرف أكثر في المجالات هاذيا فهو هذاكا الوضع الطبيعي، هاذيا مدرسة في الاقتصاد السياسي هو ينتميلها ترى اللي دور الدولة يلزمو يكون كيف ما تقول قاطرة، ودور الدولة استراتيجي وما فيشي نقاش.. خلي نكونو واضحين ماو قلنا تونس بدات في مجموعة من الإجراءات قبل ما تصحح وهذا أحد الشروط أنو أبدا الإجراءات ومبعد صحح مالاجراءات اللي بدات فيها تونس هي تقريبا وقف الانتدابات في الوظيفة العمومية بما في ذلك القطاعات اللي تحدث عليها هو الصحة التعليم إلى آخره، هنا مرة أخرى قيس سعيد قاعد يعمل في نقاش باهي أنو يحب يعمل نقاش في الرأي العام مع صندوق النقد العام وهاي رؤيتنا وأعطيونا رؤيتكم، فما زوز حاجات، أولا أنو النقاش هذا مش وحدو مش هو العقل المدبر والمفكر فما ناس ربما تخمم بنفس التوجه متاعو وقبلو هو حكاو على المواضيع هاذيا، يعيط يا خويا ويعمل شوية خلي نقولو تعبئة للمثقفين والاقتصاديين هاذوما اللي ربما يخمموا كيفو، اثنين والأهم أنو كي نخمموا هكايا كي نقولو أيا يا صندوق النقد الدولي أنا نحب هكايا بش تضغط أضغط، حط خطة بديلة في صورة صندوق النقد الدولي قالك، وهذا المتوقع أكثر يعني هو ضد الفلسفة العامة متاعو، منهجيتو في جميع دول العالم، أنو الدولة توخر من مجالات اقتصادية ما تكونش هي قاطرة الاقتصاد، وإذا كان ما يلزمهاش تصرف في قطاعات يعتبرها قيس سعيد ذات مردود اجتماعي الصحة، النقل، التعليم، إلى آخره، فإنو يلزمها تخرج تخرج، إذا يلزم ما عادش تنتدب ما عادش تصرف أكثر، ما عادش تصرف أكثر، هذا صندوق النقد الدولي يحسب، جدول الدولة توخر لتالي فما فلسفة، صندوق النقد يعبر على فلسفة في الاقتصاد السياسي معاكسة للفلسفة اللي يحكي عليها قيس سعيد، اللي هي أنو الدولة توخر من مجالات اقتصادية، إما توافق وأنا في رايي مش موافق، وإلا يكون عندو نقطة بديلة، ولهنا الإشكالية شنوة الخطة البديلة متاع الرئيس إذا كان هو داخل في سجال... وبين قوسين مانيش متأكد أنو نجلاء بودن كي تعمل توة في اللوبيينغ من أجل الاتفاق مع صندوق النقد الدولي مانيش متأكد قاعدة تقول في اللي قاعد يقول قيس سعيد"...