وأكد المزوغي أن رئيس الجمهورية كان من المفروض أن يعفي 570 قاضيا، واصفا ما يحدث اليوم في القضاء بالمخجل.
وقال ضيف في 90 دقيقة:" القضاة كي النهار متعدي من قدام المحكمة نلقاهم عاملين مظاهرة حتى الطلبة عام 70 ما كانوش يعملوها شي يحشم، تعديت بالصدفة نلقاهم في الهول هازين لافتات ويعملو في شعارات لا تليق بالمقام... هو آش عمللهم، نحا 57 ساعة أولا نلاحظ أنو نحا أقل من وزير العدل الأسبق متاع النهضة نور الدين البحيري، هو نحا 80 وهذا حشم نحا 57 برك هو حقو ينحي 570...العشرية هاذي ما يزيش حكموا فينا بالغالط وزادو نحاو النقاشات الأساسية ولينا نتعاركو هذاكا قال والآخر قال أما الأساس ما فماش... الأساس بكري وقتلي كان في عهد بن علي كانوا يقولو القضاة آه محكوم فيهم نازلين عليهم ويا لندرا شنوة ما عندهمش حرية ويلزمهم استقلالية هام طلعوا هوما ما يحبوش الحرية والاستقلالية جات الثورة الشعب التونسي خرج للشارع نحا بن علي وعطاوهم الاستقلالية ما حبوش يحيوا يخدموا بالقوادة قوادة عند فلان، فما اللي قواد معلن وفما اللي شطر معلن وفما اللي ربع معلن وفما اللي خاطيه هوكا عايش وبرا... فما حكايات متاع قضاة وحقكم تعيطولو اللي كان نائب رئيس محكمة التعقيب، نحاوه ووقفوه عالخدمة ووقفولو شهريتو لأنو ندد باللي كان واقع، وأش واقع هو في القضاء النظام السياسي النهضة ومبعد قسمو هي وسي يوسف الشاهد وهي راهي ساهلة ما أسهلش منها، شفتو الفضايح متاع العكرمي، محكمة التعقيب فيها 43 ولا 44 دايرة وشكون يعين في الدواير هو الرئيس الأول لمحكمة التعقيب، إذا كان عندك زوز دواير تولي تحكم في الدنيا الكل، ولذلك هالناس هاذوما ماهمش جديين وولاو في حالة بش يموتوا، ايجا نتحدثوا يا خويا ثم عطاهم ضمانات قالهم السيد اللي بش يطلع خاطيه بش نرجعوه وعلى فكرة جماعة ال80 اللي خرجهم البحيري رجعوا الكل لأنهم الكلهم تعسفي... ولذك حشومة بالنسبة ليا ما يقع اليوم في القضاء".