وقال الحمامي:" ما قلتش اقصاء ولكنها شروط لإنجاح الحوار الناس اللي يعتبرو 25 جويلية انقلاب وكان نجحوا بصحتهم كان يحبو يواصلو في الاتجاه هذاكا هوما يعتبروها مسألة مبدئية لكن الحوار اللي وقع في كل الأمم المتحضرة والدول المتقدمة وقع في إطار مرجعي معين... الجمهوريين كي عملوا الثورة الفرنسية وقتلي جاو يضبطو في السياقات متاعهم ما عيطوش للملوكيين... لا الاتحاد ولا الرابطة ما رفضوش المشاركة في الحوار هوما يتحدثوا على الصيغ اللي حسب رايهم هوما ينجح بيها الحوار، واحد بش يحضر حوار بش يقول على وجهة النظر متاعو ويلزم تلقا الصدى متاعها ويكون فما أحقية للجميع ولكن الحوار هذا في اللخر كي بش نتحاورو بش يكون فما وجهات نظر متعددة، فما حوار يشرف عليه رئيس الدولة... الحوار نفسو متاع 2013 الكلام هذا نوجهو للاتحاد، الرباعي هو اللي يسير في الحوار حضر الجميع وراهو نفس التمشي تعطات خارطة طريق وعلى أساسها هي اللي موافق على أنو يكون المنطلق خارطة الطريق دخل للحوار اللي ماكانش موافق كيما المؤتمر من أجل الجمهورية ما دخلش، والمنطلق كان خاطر الطريق اللي قدمها الرباعي وقع الامضاء عليها من طرف الناس اللي شاركت في الحوار وكانت فما اختلافات وكان في كل مرة بعد ذلك الرباعي هو اللي يوجد في القنوات وخرجتلنا بعد ذلك مخرجات مالحوار متاع 2013... اللي قاعد يقول فيه رئيس الدولة هو نفس التمشي بالضبط مش تنطلق الناس من مخرجات الاستشارة الالكترونية، يدخل في الحوار الناس اللي هوما مع خط 25 جويلية، وفما رئيس الدولة اللي بش يشرف عالحوار هذا وأكيد رئيس الدولة عندو نفس الحرص اللي متوفر عند الجميع انو ينجح الحوار وانو نخرجوا متحدين منو وأني تونس تخرج أقوى من هذا الحوار ماللي كانت عليه قبل سواء اليوم ولا قبل 25 جويلية 2021".
كما أوضح ضيف البرنامج في سياق متصل أنه لم يقع دعوته لحضور اجتماعات لمعارضي رئيس الجمهورية قيس سعيد وليس معنيا بها من الأساس.