وأضاف سويلم أن تونس ليست بلاد تضخم تاريخيا، لأن فيها مؤسسة كمؤسسة البنك المركزي التي ساهمت في استقرار نسب التضخم.
وقال المدير العام السابق للسياسات النقدية بالبنك المركزي:"  كنت عملت دراسة معدل التضخم في تونس من 1962 تقريب حتى ل2019، هو 5.2 بالميا، أول حاجة اليوم نشوفوها نسبة التضخم اليوم اللي عرفتها تونس أعلى معدل عرفتو البلاد منذ الاستقلال، ولكن مش الأرفع منذ 1995 أو 1991 كيما قالو الجماعة.. أحنا في جوان 2018 أعنقد أو جويلية وصلنا لـ7.7 بالميا، أنا اليوم اللي مخوفني مش هذا اللي ىيخوفني هو وين بش نوصلو، اليوم 7.2 بالميا مؤشر معدل.. الدولة ما عدلتش أسعار المحروقات في شهر مارس المفروض كل شهر تعدل، يتخوفو مالانعكاسات لأنو أسعار المحروقات كيما أسعار الصرف متاع العملات تمس كل المنتجات، تمس المقدرة الشرائية والأسعار تزيد تلهب... أحنا تقنيات نسميوها التأثيرات متاع الدورة الأولى متاع ترفيع أسعار المحروقات والتأثيرات متاع الدورة الثانية.. اذا كان تزيد في المحروقات الفلاح اللي بش يستعمل التراكتور بش يزيد في سوم الطماطم والفلفل وهذوكم مبعد المستهلكين اللخرين اللي بش يشريوا بش يعملو الحسبة متاعهم"...
وتابع محمد صالح سويلم:" اليوم راهو كان نرفعو في أسعار المحروقات، الدولة بش تكون أمام خيارين كل واحد أمر مالاخر، كان بش ترفع في أسعار بعض المواد المدعمة رانا ماشين في التضخم وتزيد تلهب الدنيا وانجمو نمشيو حتى أكثر من 10 بالميا، وماتنساوش راهو المعهد الوطني للإحصاء كان في إضراب وعندو شهرين ما خرجش"...