أكد الناشط السياسي جوهر بن مبارك اليوم الجمعة 21 أكتوبر 2022، خلال حضوره في برنامج في 90 دقيقة على إي أف أم، أن التجربة التي أعلن نهايتها عبر تدوينة له على الفايسبوك يوم 16 أكتوبر تتعلق بتجربة عاطفية ولا علاقة لها بالسياسة.

وقال بن مبارك:"  نهار 16 أكتوبر نحكي على تجربة عاطفية ما عندها حتى علاقة بالسياسة... أنا عضو الهيئة التنفيذية لجبهة الخلاص هذا كان البارح واليوم وغدوة ان شاء الله... المهم في 15 أكتوبر أنو جبهة الخلاص قامت بتحرك سياسي ضخم كبير جدا ناجح من الناحية الجماهيرية والإعلامية والخطاب السياسي والمواقف التي تم الإعلان عليها... تحرك من الناحية السياسية حسم الكثير من اللغط، حول حجم جبهة الخلاص في الشارع وقوتها وقدرتها على التعبئة والتأثير وبرزت جبهة الخلاص بكل موضوعية كالقوة السياسية رقم واحد في البلاد... ما صارتش حتى عركة ... اللي صار أسأل عليه خليل الرقيق هو يعرف خير مني ... ما فماش منها الحكاية الكلها خرافة ... ما صار شي لم يحدث أي شيء... تمت المظاهرة بشكل جيد، تحققت أهدافها السياسية ما وقع فيها حتى خلاف ولا حتى عركة، لكن اللي حدث إنو انطلاقا من ليلة 15 صارت حملة شرسة غير أخلاقية على جبهة الخلاص على الأساتاذ نجيب الشابي على شيماء عيسى عليا أنا شخصيا، الحملة هاذيا كانت حملة منحطة أخلاقيا، فيها الكثير من الوصم الكثير من التقزيم وسلخ الأشخاص، الحملة هاذي ننددو بيها وجبهة الخلاص ومكوناتها ننددو بيها، واعتبرناها محاولة لإفشال مسيرة 15 أكتوبر ومحاولة استيعاب النجاحات اللي حققتها جبهة الخلاص في المسيرة هاذي... ائتلاف الكرامة في جبهة الخلاص.. باش نوضح المسألة للناس اللي مع الجبهة قبل غيرهم ولأنصار الجبهة، ائتلاف الكرامة طرف في جبهة الخلاص مبرمج أنو يأخذ الكلمة في المظاهرة وخذات حليمة الهمامي الكلمة كما أراد ائتلاف الكرامة، سيف مخلوف ما كانش مبرمج أنو يأخذ الكلمة، خذا الكلمة في اللخر لتحية الجمهور، واسترجعت شيماء الكلمة وانتهى الأمر، لكن الحملة اللي صارت من بعد هي حملة غريبة، الحملة ما نعرفوش بالضبط شكون اللي نظمها كيف انطلقت، ولكن فما اليوم حديث أنو بعض عناصر أو قواعد من ائتلاف الكرامة انخرطوا في هذه الحملة وهذاكا علاش أحنا طلبنا من ائتلاف الكرامة أنو يوضح الموقف لأنو هو في الجبهة كيفاش يقوم بحملة ضد الجبهة وهو طرف في الجبهة أيعقل هذا يا هذا؟... ائتلاف الكرامة قال لا ما قمتش بالحملة واعتبر أنو هذا محاولة لتشويهو، أحنا ننتظرو أنو ائتلاف الكرامة يوضح المسألة هاذيا بش ينأى بنفسو عالحملات هاذيا بش يتضامن مع المتضررين مالحملة هاذيا، ولكن الأهم من هذا أنو علاش فما وجوه بعينها في جبهة الخلاص نجيب الشابي شيماء عيسى، جوهر بن مبارك هوما محل قصف من كل الجهات، أنا أعتقد أنو فما صورة نمطية تبنات عليها السياسة في البلاد، هي صورة الإسلام السياسي النهضة والبقية، الشارع المحافظ النهضاوي أو القريب من النهضة، أو الإسلامي من جهة والبقية، الصراع تبنات عليه 10 سنوات من الانتقال الديمقراطي هذا هو الاستقطاب السياسي اللي تبنات عليه السياسة في البلاد واللي دمر السياسة"...