اعتبر خليل الرقيق كرونيكور برنامج في 90 دقيقة على إي أف أم، اليوم الجمعة 3 جوان 2022، أن اختيار الأحزاب المشاركة في لجان الحوار الوطني لم يكن اعتباطيا واستند إلى معايير واضحة.

وقال الرقيق:" ... حركة الشعب نعرفو في مؤتمرها الأخير صار خلاف عميق بين قياداتها حول تقييم 25 جويلية وسياسات قيس سعيد، فما قطب يقودو سالم الأبيض والآخر فيه المغزاوي وهيكل المكي وغيرو... حركة الشعب في الداخل متاعها يلزمها اجتماع متاع هياكل لتحديد موقفها اللي أعتقد بش يكون إيجابي، ولكن بش يتم عليه تصويت ونقاش كبير لأنو الحركة عندها خلاف من الموضوع ... بالنسبة لآفاق تونس أولا في معيار اختيارها، اختيار حزب مختلف لإضفاء تعددية عالحوار، في معيار إجابتها أمينها العام تقريبا حط روحو في المنصة وبش يشارك في الانتخابات الرئاسية وعندو برنامج آخر غير التفاعل مع السلطات وربما يوجد حرج في أنو يتواجد في تجربة يعتقد أنو منافس ليها ... البقية التيار الشعبي انجم نقلك آليا بعد اجتماع لجنتو المركزية أو مكتبو التنفيذي سيكون في قلب الحوار، شكون آخر عبيد البريكي عبيد البريكي صرح بالاسم والصفة في كل المنابر الإعلامية أنه سيكون موجود في الحوار، شكون بقا، حركة النضال الوطني ستكون موجودة في الحوار... كلمة الصدفة ما فماش... فما معايير اختيار يلزم نقراو الخلفية الأصلية والجدية في الموضوع الأحزاب مافيها مستجد في الساحة السياسية ظهر بعد 14 جانفي كان آفاق، النضال الوطني عبيد البريكي والتيار الشعبي وحركة الشعب، أحزاب ولدت سياسيا منذ سبعينات القرن الماضي، فما الجدية الكافية وعندها التمثيلية الكافية على المستوى الفكري والسياسي، الاختيار ماكانش اعتباطي".