علق خليل الرقيق كرونيكور برنامج في 90 دقيقة اليوم الاثنين 12 ديسمبر 2022، على تصريح أمين عام التيار الديمقراطي غاز الشواشي حول المعارضة ورئيس الجمهورية قيس سعيد.

وقال الرقيق:" المعارضة اللي يحكي عليها غازي الشواشي مش فقط معارضة فاشلة هي حكم فاشل... الناس اليوم اللي تعاني في الأمرين من ذلك الحكم الفاشل ما تحبش ترجع لنفس الوضعية ونفس الوجوه ونفس القيادات اللي خلاتهم ياقفو في المنيهلة وسيدي حسين وفي جرجيس.. نوصلو للحلقة الأساسية، كيف يحس قيس سعيد ويمكن أي واحد آخر أنو معارض وهو في السلطة، لأنو تركة الحكم الفاشل متاع المعارضة الفاشلة توة، كانت من الفظاعة والقوة ومن الكارثية بحيث أنو يصعب التعامل معاها إلا بإيجاد موارد بديلة تعوض الخسائر اللي خسرناها، معناها أحنا توة ناقفوا على الأرض المحروقة اللي خلاتهالنا حركة النهضة، تاقف معاها بإرادتك بجواجيك، تمشي لناس تبكي معاهم، تعيط معاهم، تعمل اللي تحب انت ولكن في الحقيقة تونس الآن غير قادرة لا على تنمية الأحياء لا على تنمية الجهات، إلا بمعجزة اقتصادية، وإلا بتفكير عميق وإلا بمسارب مختلفة تنجم تهزنا بش نرجعو من جديد، خلاونا غير قادرين على العودة، هذا واضح، وهذاكا علاش اليوم كي تمشي قدام المسرح، تمشي للمدينة تلقى 400 وإلا 500 واحد كل واحد منهم عندو صفة، ما معاه حتى واحد مالشعب اللي مش لاقي باكو حليب، ومش لاقي هاذيكا ومش لاقي هاذيكا، قيس سعيد جاتو فرصة تاريخية أنو الناس لحد الآن لم تفقد منه الثقة وهو في هذه الحالة من مجابهة الظروف الاقتصادية التعيسة ولكن إلى أين سيمضي ذلك، تعرف المعارة في تونس أما هي، هي اللي تعملت في الحوض المنجمي، الأصعب من تحركات المعارضة السياسية وهاذي السلطة يلزم تحطها في بالها، هو التحركات التلقائية الذاتية، أنا انجم نقلك تحرك جرجيس أقوى بكثير من تحركات كل الأحزاب مجتمعة، تحرك الحوض المنجمي كان تلقائي أدى لتغيير سياسي، التحرك اللي مبعدو متاع سيدي بوزيد كان تلقائي أدى لتغيير سياسي، الشعب مازال يتحرك وحدو لأنو ما عندوش قيادات ميدانية يثق فيها، جاء قيس سعيد ورجع ربما الكفة إلى هؤلاء التلقائيين اللي عاودو تحركوا في 25 جويلية، ولكن المتابعة صعيبة برشا والتخطيط صعيب برشا، وراهو البلاد هاذيا، الرهان الحقيقي الوحيد متاعها هو الجوانب المختلفة اللي فاعدي يضربو عليها في الأسواق العالمية، لقاءاتنا باليابان وأمريكا والصين وغيرو، ةلقاءاتنا بالمجموعة العربية فماش ما نوجدوا متنفس بش مبعد نصلحو أغلاطنا ونتلهاو بمواردنا الذاتية وكذا"...