فسر خليل الرقيق كرونيكور برنامج في 90 دقيقة على إي أف أم اليوم الخميس 24 مارس 2022 السبب الذي جعل رئيس الجمهورية يتقدم بـ14 نقطة كاملة في نوايا التصويت للانتخابات الرئاسية، وفقا لما أظهرته نتائج البارومتر السياسي الذي أصدرته مؤسسة سيغما كونساي بالاشتراك مع جردية المغرب.

وقال الرقيق:" الرئيس طلع ب14 نقطة كاملة بين الشهر الفارط والشهر الحالي، 88 بالميا من نوايا التصويت للانتخابات الرئاسية و29 بالميا فقط ما أدلاوش بنواياهم، بمعنى نسبة مئوية كبرى.. يقول القايل نقاسيو الأيامات هاذي مشاكل الدنيا الكل هبطت علينا، مشاكل البنية الأساسية والماء، للأزمة الاقتصادية والمالية، الناس الكل شاكة في المستقبل التوانسة متشائمين، تعطي 88 بالميا لشخصية معينة، بمعنى أولا يبدو الناخب ما عندوش اختيارات أخرى.. والناخب مازال يعيش في الثقة كون الانسان هذا قادر يمشي لقدام، 14 نقطة القدام حاجة كبيرة برشا، يبدو أيضا أن سياسة القرب من المواطن وحكاية الحرب ضد الاحتكار والمحتكرين".
وتابع كرونيكور البرنامج:" نعتقد نهار اللي هبط للشارع ودخل للمحلات وكلم الناس وقبل الناس البسطاء، نهارت اللي حس المواطن التونسي اللي أهم نقطة بالنسبة ليه مركزية، معيشتو بدات تتحط عالطاولة خبزتو بدات تتحط عالطاولة، بمعنى لقا الشخصية اللي كانت عندها الجرأة الكافية لتفكيك منظومة إجرامية كبيرة مدت عروقها في البلاد في السياسة وفي الاقتصاد وفي المجتمع، هذا أنا نعتقد اللي هاذي النقطة اللي خلقت شوية إبهار، وديما ناخذو بعين الاعتبار نسبة التشاؤم متاع التونسيين، بمعنى لو هو ما يحولش سياسة القرب متاعو إلى منجزات ملموسة راهو مبعد بش يخسر كيف كيف".