انتقدت المحامية والناشطة السياسية دليلة مصدق اليوم الاثنين 6 جوان 2022، خلال حضورها في برنامج في 90 دقيقة على إي أف أم، انتهاك أعراض قضاة عبر صفحات الفايسبوك.

وقالت مصدق:"صارتلنا صدمة البارح كي شفنا أعراض قضاة يتم تداولها على صفحات الفايسبوك، والأخطر من هذا الكل اللي القضية متاع الزنا تم إثارتها من طرف رئيس الجمهورية قيس سعيد، اللي يجي في قرار إعفاء يحكي على الحياة الخاصة للقضاة وعلى أمور ما تهمش المتقاضين لا من قريب ولا من بعيد، القاضة نها المجلس الوطني لجمعية القضاة اللي قرروا فيها الإضراب عملت شهادة وقالت نعتقد عزلي في علاقة بتدخلات صارت من طرف عائلة قيس سعيد، كردة فعل المجموعات الفايسبوكية اللي تخدم لصالح قيس سعيد تقوم تهبط محاضر بحث اللي هي تهبطها ولا ما تهبطهاش ما تغير حتى شي في الأمر، لأنو المسألة مش مسألة قاضية زنات ولا ما زناتش ولا عملت ولا ما عملتش أمورها الشخصية وكل الاحترام والتقدير ليها، أما أحنا كنساء حسينا برواحنا ممسوسين في مصارنا وفي جواجينا، ما نعرفش أنا تبدا غدوة رئيسة حزب في قضية طلاق مع راجلها تجي تترشح للانتخابات يقولولها لا انت بو راجلك قال عليك.. وبيك وعليك معناها وصلنا لمستوى رديء ومقزز يدعو للاشمئزاز مستوى مش متاع شعبوية مش شعبوية هاذي، هذا إجرام في حق الوطن إجرام في حق القضاء، إجرام في حق النساء، الحقيقة ما نجمناش نقعدو ساكتين، أحنا مجموعة من المحامين مخضوضين من مواقف هياكلنا، الهياكل اللي ما تاخذش موقف، أحنا محامين لسان دفاع معناها الناس تجينا بش ندافعو عليهم كيف يبداو متهمين، إذا اليوم هياكل المحاماة تقبل إنو الناس تتعاقب من غير أنها تدافع على روحها ومن غير ما تتحاكم ولسان الدفاع يسكت معناها قبل بنهايتو لسان الدفاع قبل وأنو وظيفتو ما عندها حتى معنى وحتى دور وقبل أنو الناس تنجم تتحاكم دون أن يتم الدفاع عنها، نقول حاجة برك للمواطنين اللي تسمع فيا راهو كي يبدا واحد ذبح 20 رقبة وقطعهم طروف وحطهم في فريجيدار الشخص هذا الحيوان هذا الوحش هذا عندو الحق فغي الدفاع، فما بالك بقاض هل يعقل أنو نعاقب قبل أن نحاسب ونحاكم ونترك فرصة للمتهم أو المظنون فيه أن يدافع عن نفسه ويمد أسانيدو"...