أكد سفيان بن حميدة كرونيكور برنامج في 90 دقيقة على إي اف أم، اليوم الثلاثاء 19 جويلية 2022، أن مثول راشد الغنوشي أمام القضاء يعد حدثا يؤشر تغير الوضع في البلاد ووضع حركة النهضة.

وقال بن حميدة:" ما عادش تنجم النهضة ورئيسها وقياداتها يعملو اللي يحبو، وقتلي يعيطولهم لازمهم يجيوا، هذا الجديد والجديد الآخر هاو تشوفو هذا رئيس مجلس النواب المنحل ورئيس حركة النهضة العباد اللي هبطت تساند فيه ما انجموش نقولو حشد، لا ماهوش جمهور مجموعة فقط وهاذي ثاني مرة تصيرلو، المرة اللولى ليلة 25 جويلية 2021 وقتلي هو بيدو طلب أنو العباد تلتحق بيه لقا روحو مع أقل من 500 عبد المرة هاذي زادة قدام محاكمة، والمحاكمة طبيعي جدا أنو راشد الغنوشي، عنا مثل يقول العظمة ما تقول طق إلا ما فيها شق، فما شقوق العظمة طرشقت عندها مدة... معناها راشد الغنوشي موقعو المدة اللي قضاها في قيادة هذا التنظيم بتفرعاتو، اليوم فما تقريبا انطباع عام وراشد الغنوشي يدير كل الشبكات المعلنة وغير المعلنة للتنظيم، بدات تتوضح الأمور شوية يبدو، بدات بعض المعلومات تخرج وراهو في الحقيقة المعلومات هاذيا بدات تخرج في القضاء ولنا نحب نقدم شكر كبير لهيئة الدفاع في ملف الشهيدين لأنها هي المنطلق راهو وهي خلات الدوسي ديما موجود عالطاولة لكن ما تنساش أنو راهو في العديد من المحطات قياديين من داخل النهضة والحركة الإسلامية أشاروا إلى هذا الخور المالي والعسكري غير المعلن داخل الحركة".