أكد سفيان بن حميدة كرونيكور برنامج في 90 دقيقة على إي أف أم اليوم الثلاثاء 15 مارس 2022، أن رئيس الجمهورية قيس سعيد أعلن ساعة الصفر من مقر وزارة الداخلية وتصرف على أساس أنه قائد ميداني.

وقال بن حميدة:" فما قواد ميدانيين يقودو حرب وفما اللي يقودو صنعان خبزة كل واحد وإمكانياتو.. قيس سعيد منذ 25 جويلية خاض 3 معارك وهو يخوض الآن المعركة الرابعة وهي مصيرية.. المعركة الأولى ربحها بالساهل لأنو كانوا طايحين قبل الضرب هي المعركة مع البرلمان، المعركة الثانية اللي ربحها هي المعركة ضد القضاء، لأنو فعلا الكلام اللي كنا نقولو فيه تحت حس مس جاو القضاة أنفسهم والكبايرية متاع القضاة وفرتوه للعلن واكتشفنا اللي الوسخ داخلهم أكثر ماللي نتصوروه، فربح معركة القضاء، المعركة الثالثة كانت مع حركة النهضة والإسلاميين، الحقيقة يلزم نوضحو أنو رئيس الجمهورية لم يعلن حرفيا وبصفة مباشرة دخولو في معركة ضد الإسلاميين، التوانسة فهمو من الخطابات الاخشيدية متاعو أنو يتوجه للإسلاميين، في المعركة هاذي اليوم نقلك وبعد الافراج على نور الدين البحيري انجم نقلك أنو حركة النهضة ربحت المعركة هاذي بالنقاط، المعركة هاذي ضعفتو على المستوى الدولي، أما على المستوى الداخلي ما ربحتش، المعركة الرابعة، اللي هي معركة الخبز والسميد أنا نقول معركة رمضان، في المعركة هاذي رئيس الجمهورية يعرف الخطورة متاعها علاش لأنها مرتبطة بشعبيتو اللي هي مرتفعة الآن واللي ينجم يخسرها لأنو التوانسة في رمضان اللي عندهم شوية دلال وعندهم تقاليد متاع إسراف في الماكلة، متاع التنويع بش التوانسة لمدة 30 يوم كل ليلة وقت شقان الفطر بش يعطيو الحكم متاعهم على الرئيس قيس سعيد، وهي المعركة الأهم بالنسبة لاستقرار حكمو"...