وقال بن حميدة:" نسبة المشاركة الساعة يتوجه لشكون الأطراف هاذي اللي كبشت في نسبة المشاركة الضعيفة، زعما بعثة الجامعة العربية والا البعثة الافريقية والا مركز كارتر... ما قلناش نحنا نسبة المشاركة الضعيفة قالها الناطق الرسمي باسم الايزي، قال ضعيفة، نهار اللي قالو الستة متاع العشية 803 آلاف، بعد بنهارين بش يحسبو مكاتب زوز في جربة وواحد في جرجيس من الستة للثمنية، لمدة ساعتين، تزادو 200 ألف صوت، كي تلمهم المكاتب التلاثة ما يجيوش 150 ألف، إذن حتى كان حتى حد ما صوت فيهم للستة ونصف متاع العشية فما 50 ألف زايدة، أنا مش بش نقول النتائج مزورة أما بش نقول أنهم في الإيزي ما يعرفوش يحسبو، وماهيش أول مرة لأنو راهو في الاستفتاء راهم غلطو في الحسابات زادة، لكن يا سيدي برة نمشيو كيما قال الرئيس، مليون ولا مليون ونص باقي بش يكونوا موجودين في كتاب غينيس لأفشل انتخابات، رئيس الجمهورية البارح خرجلنا بطريقة جديدة لا يعرفوها لا في السند ولا في الهند في نسبة نجاح الانتخابات... أحنا نحسبو في نسبة المشاركة في الدور الأول اللي هي ضعيفة برشا، بالطبيعة فاشلة كي تبدا النسبة ماهي مكهبة على حتى شي، يا سيدي نمشي معاه رئيس الجمهورية هذا الشوط الأول، نزيدو نستناو معاك الشوط الثاني ونمشيوا معاك للحصص الإضافية اللولى والثانية والبنالتيات، نقولولك الانتخابات متاعك فاشلة، للأسف محمود درويش قالها على الصهاينة أنا بش نقولها للنوانسة متاعنا اللي من دمي ولحمي، خوذوا حوايجكم وأرحلوا، جماعة الإيزي لموا دبشكم خوذوا اللي تحبو برا امشيوا يكفي يزي ما عملتوا في البلاد وشوهتولها صورتها، يزي ما عطيتونا كل المؤشرات متاع عدم الكفاءة... الإيزي عندها الولاية الكاملة والوحيدة على المسار الانتخابي"...
Address: Immeuble Louati 4e étage Lot 6.5.9
Les Jardins du Lac - Tunis - Tunisie
Tél: +216 70 016 020
E-Mail: contact@ifm.tn