أكد سفيان بن حميدة كرونيكور برنامج في 90 دقيقة على إي أف أم، اليوم الخميس 1 سبتمبر 2022، أن التونسيين قد نسوا معنى أن تكون العودة المدرسية طبيعية.

وقال بن حميدة:" عندنا أعوام طويلة العودة المدرسية ما تصيرش في ظروف طبيعية لأنو الأساتذة ناقصين وهذا ولات مشكلة هيكلية، البنية التحتية تعيف، رانا توة العودة المدرسية بش تجي فما العديد من المدارس والمعاهد المرمات في وسطهم مازالت، هاذم اللي عندهم زهر ونجموا يرقعولهم في البنية الأساسية متاعهم، أما العديد من المدارس الأخرى اللي بش يدخلو والشبابك مكسرين والحيوط مش مليقة والسقف تنجم تهبط منو لقشة في أي فترة، والضو شوف يشعل ولا ما يشعلش، وبالطبيعة ''التوالات'' أغلبهم مكسرة، الماء في العديد من الجهات مش موجود، الوضعية تعيسة جدا الشي اللي يخلي أنو الحق الأساسي في التعليم اللي هو كان من القواعد الأساسية لنظام الجمهورية في تونس اليوم ما عادش ماخذ حظو برشا، شي يوجع".