علق سفيان بن حميدة كرونيكور برنامج في 90 دقيقة على إي أف أم، على تصريحات أمين عام اتحاد الشغل نور الدين الطبوبي التي كشف فيها امتلاكه لمعلومات حول تقديم وزير التجارة لمقترح يتعلق بمنح مبلغ 118 دينار لكل فرد سنويا في إطار ما يسمى بتوجيه الدعم إلى مستحقيه.

وقال بن حميدة:" فما سطو على قرار المجموعة الوطنية...الحكومة مشات عملت برنامج عطاتو لصندوق النقد الدولي لاهي متفقة فيه لا مع الأحزاب لا مع المنظمات، وما علمتهش بيه، أكثر من هكاكا قاعدة تطبق فيه حتى قبل ما يتم التوقيع الرسمي على الاتفاق وتعتبر أنو الموضوع عادي، وماهيش متقلقة أحنا متقلقين أما هوما مش متقلقين... الطبوبي اليوم قالك أنا عندي معلومات اللي وزيرة التجارة تعتبر أنو راهو بش انحيوا الدعم، هوما رفع الدعم سماوه توجيه الدعم لمستحقيه، إي هاو وجهوه لمستحقيه، كيفاش بش يعطيو 118 دينار في العام، ياخي انت الضو والماء والايسونس والسكر والقهوة والمقرونة والسميد هاذم الكل يغطيهم كي الـ118 دينار... كي تغزر للقايمة أصلا راهو 118 دينار ماهوش تعويض حتى لزوز plein  متاع ايسونس... راهو يزيو، باهي سيدي هاو الطبوبي آش قاللكم، انت وزيرة التجارة هاني سميتك، أخرج كذب، كان انتوما صحاح أخرجوا كذبوا، إذا ما تكذبوش إذا كلامو صحيح.. هذا ماهوش تصعيد، هذا تحذير من وضعية صعيبة، مبعد بش يتعداو للفعل، انت ما رديتش مالا أنا بش نعمل إضرابات قطاعية، ما كفاتش الإضرابات القطاعية نعمل إضرابات عامة... مازال ما عملوش الإضراب العام ويوخر فيه وهذا دليل على إنو ما يحبش يمشي لغادي على خاطر الإضراب العام تخسر فيه الدولة أكثر ماللي وقتلي ما تعطيش حقوق المواطنين، لأنو إضراب عام متاع 3 أيام يطيحلك نقطتين في معدل النمو".