علق شكري حمادة الناطق الرسمي باسم نقابة قوات الأمن الداخلي اليوم الأربعاء 6 جويلية 2022، خلال مداخلة هاتفية مع برنامج في 90 دقيقة على إي أف أم، على أحداث العنف والفوضى التي شهدها مطار تونس قرطاج الدولي ليلة البارحة.

وقال حمادة:" قبل كل شي نتمناو الشفاء العاجل لزملاءنا بلال ورشيد... فما واحد مازال في المستشفى إصابات بليغة وخطيرة جدا وإن شاء الله ربي يشفيهم ويرجعوا سلامات عايلاتهم في العيد هذا 
اللي صار في المطار هي فوضى وهناك سبب لتلك الفوضى وأحنا البارح في إطار ممارسة مهامنا ووظائفنا في المرفق العام تعرضنا للعنف، علاش تعرضنا للعنف، البارح كان فما مسافرين من بلدان إفريقية يحبو يروحوا لبلدانهم قاصين تساكرهم، جابوهم للمطار 8 سوايع و10 سوايع قبل على علمهم كونو فما في مطار تونس قرطاج سفرات ورحلات منظمة والناس هاذيا تنجم تاخو طيارة وتروح إلا أنو الواقع هو عكس ذلك، الناس هاذيا مشا في مخيلتهم كونو أعوان الأمن هوما اللي ما خلاوهمش يطلعوا مشاو للبوابة الرئيسية للدخول للمطار حبوا يسكروها وخلقوا فوضى كبيرة ولولا التدخل بصفة حضارية لأعوان الأمن في المطار البارح لكانت تقع كارثة حقيقية، المتهمين هوما 8 أشخاص من جنسيات إفريقية، النيابة العمومية تكفلت بهذا الموضوع، وهنالك 8 إيقافات، شكون المتسبب في الفوضى في المطار إلى حد هذه الساعة كان تدخلوا توة لمطار تونس قرطاج، بش تلقاو مسافرين من جنسيات أخرى يتعرضو لنفس المشكل ما فماش اليوم بالنسبة لمطار تونس قرطاج طائرات لنقل المسافرين، الناس تقص إلى حد البارح في الليل نحنا حتى لماضي ساعتين في المطار، اليوم من ينظم الرحلات شركة الخطوط التونسية من يملك الأسطول الجوي الخطوط التونسية، انت كي تخرج بلاغ وتقول الرحلات متواجدة اليوم وتنجمو تتفضلو وتجيب المسافرين للمطار، إذن من هو المتسبب في هذه الفوضى؟ هو اللي جاب المسافرين هاذوما واللي عطاهم المعلومة الغالطة هو المتسبب في الفوضى، المتسبب في العنف تم إيقافو والمتسبب في الفوضى هو شركة الخطوط التونسية"...