كشف طارق الكحلاوي كرونيكور برنامج في 90 دقيقة على إي أف أم، اليوم الخميس 1 ديسمبر 2022، وجود ملف مهم في زيارة رئيس الحكومة الليبية عبد الحميد الدبيبة إلى تونس يتعلق بتوقع تونس للحصول على قرض أو وديعة.

وقال الكحلاوي:" هاذي ملفات كانت مطروحة قبل وتم تأجيلها بسبب المشكل السياسي لأنو كان التيار ما يتعداش بين حكومة الدبيبة وقيس سعيد لعدة أسباب ومن 25 جويلية خاصة، تعرفو من آخر الزيارات اللي عملتها حكومة المشيشي البرة، كانت للدبيبة وكان فما تصور عند قيس سعيد اللي الدبيبة في الصف متاع المشيشي والنهضة، ومش بعيد برشا لا محالة في ظل التموقعات والاصطفافات الإقليمية متاع وقتها، أنا يظهرلي أهم دوسي اللي تحت الطاولة في الزيارة هاذيا بخلاف الموضوع السياسي أنو بش يقع إعادة العلاقات السياسية وتسخينها، يبدو تونس متوقعة أو تنتظر تأخذ قرض أو وديعة من عند الطرف الليبي في ظل الاتفاقية الجديدة متاع صندوق النقد الدولي، المعلومة اللي عندي أنو الحكومة تحتاج من هنا لآخر العام للإيفاء بالالتزامات المباشرة الضرورية في حدود 3 مليار دينار، تونس يبدو في حالة تأهب دبلوماسي لجمع الأموال هاذي ويبدو الأطراف اللي معنية ربما تعطي يد المساعدة في الاتجاه هذا من هنا لآخر العام هوما الجزائر ليبيا وأيضا الحكومة الفرنسية، ويبدو فما عمل من قبل الحكومة التونسية ومن خلال قيس سعيد والأطراف الدبلوماسية لجمع الـ3 مليار دينار.. وما نعرفش هل الليبية والدبيبة مستعدين يقدمو جزء مالمبلغ هذا"...