علق طارق الكحلاوي كرونيكور برنامج في 90 دقيقة على إي أف أم، اليوم الجمعة 2 ديسمبر 2022، باستغراب على وصف رئيس الجمهورية لما يقال ويحدث حول الرفع التدريجي للدعم والتفويت في المنشآت العمومية بالشائعات.

وقال الكحلاوي:" حسب كلام الرئيس وزارة الطاقة وزارة الشائعات وكل 3 شهر تهبطلنا زيادة في أسعار المحروقات والشائعات متاعها نخلصوها شائعات 150 فرنك، هاذي وقائع...تصريح رسمي آخر، وزير الاقتصاد خرج مبعد ما خرجت مديرة صندوق النقد الدولي أطلقت شائعة، ماناش نحكيوا على صفحة البني بني في الفايسبوك، وإلا صفحة يلا سوا، نحكيلك على مديرة صندوق النقد الدولي عملت تصريح رسمي قالت تونس وافقت على بيع عدد من المؤسسات العمومية، يجي وزير الاقتصاد قال نحنا رانا سندرسها حالة بحالة، وفما مؤسسات عمومية استراتيجية ماناش معنيين ببيعها، وفما مؤسسات عمومية غير استراتيجية وهاذيكا هي المعنية إما بإعادة الهيكلة وإما بالتفويت... عنا رئيس جمهورية يخرج البارح يكذب أولا وزارة الطاقة ومديرة صندوق النقد الدولي، ووزيره للاقتصاد اللي هو معاه ومازال محافظ على موقعو.. وزارة الطاقة اللي تعمل فيه شنوة هذاكا؟.. الحكومة ما فيبالها شتوة بش تفيق وبش تأخذ بعين الاعتبار الإلغاء التدريجي للدعم هذا هو معناها؟.. حطلي على جنب خطاب الاتحاد في 3 ديسمبر أعطيني الوقائع، توة جماعة الاتحاد يرضعو في صوابعهم الجماعة يعرفو شنوة الإلغاء التدريجي للدعم وعندهم ناس خبراء تشوف ويعرف اللي إعلانات وزارة الطاقة هو تجسيم لما تم التنصيص عليه في اتفاق الخبراء مع صندوق النقد الدولي... توة في رفع الأسعار متاع البنزين الدعم قاعد يمشي لمستحقيه؟... الرئيس كل مرة يخرج يكذب ما يقال وما يصير في علاقة بالإصلاحات، قاعد يقول فيها شائعات... ماللخر بالنسبة ليا بلاغ الرئاسة البارح هو بلاغ جاهز موجود عند أدمين صفحة الفايسبوك، كل جمعة كل جمعيتين الرئيس يقلو هبط كي البلاغ كيما هو، أما الرئيس يعمل في خطاب مزدوج وواعي بروحو ، هو يبيع لعموم الشعب التونسي أنو يا شعب أنا نمثلك راني أنا ضد ومع الدولة اللي تدعم كذا وكذا والحكومة هاذي هاني قاعد ننصح فيها على أساس أنو ما يعرفش الحكومة هادي فاش قاعدة تعمل وهو يعرف جيدا الحكومة هاذي آش قاعدة تعمل، لأنوح اشتو لأسباب سياسية أساسا باتفاق صندوق النقد الدولي لأنو ما عندوش حل واحد آخر هو يعرف منطق موازين القوى أنا مشكلتي مش هالإصلاحات أساسا انجمو نتناقشو فيهم الإصلاحات، مشكلتي الرئيس يصر على استبلاه التوانسة بتكرار دائما وأبدا أنو الحقائق الموجودة في الواقع وترا فيها الناس الكل اللي هي الإلغاء التدريجي للدعم متاع الأسعار كما قال بيان رسمي متاع صندوق النقد الدولي يعتبرها إشاعات"...