علق طارق الكحلاوي كرونيكور برنامج في 90 دقيقة على إي أف أم، اليوم الخميس 10 نوفمبر 2022، على استدعاء راشد الغنوشي للتحقيق في علاقة بقضية انستالينغو.

وقال الكحلاوي:" بالنسبة لوجود الغنوشي في تفاصيل القضية مازال ما فماش وضوح، خاصة القضية عندها مدة مطروحة... أنا مرة أخرى في علاقة بكل ما هو قضية لحركة النهضة وقياداتها، إذا كان فما واحد شافها في الأشهر اللي فاتت وأكيد واضحة، اللي هي معنتها زايد، انت عندك ملفات، اللي عندو ملف صحيح وجدي تاو نشوفو وين بش يمشي، هل بش يقع إصدار بطاقة إيداع، شنوة أحد مؤشرات جدية ملف؟ هو أنو يقع إيداع المعني إلى أن يتم استكمال التحقيق، ما يقعش إيداع لاستكمال التحقيق هذاكا بالنسبة للقضاء معنتها ملف مش جاد على الأقل بالنسبة للشخص هذاكا، مش أنستالينغو مش جاد، لكن أنا اللي الحاجة اللي نحب نقولها في علاقة بحاجة هو قالها اللي أنا يظهرلي ماهياش بعيدة برشا على الحقيقة اللي هو أنو عمليا القضايا المتعلقة بقيادات حركة النهضة بالنسبة لقيس سعيد هي مالإجراءات القليلة اللي مازالت محافظة على حزام حولو، الناس اللي معارضين للنهضة اللي بالنسبة ليهم العشرة سنوات الفارطة هي كارثية وبالتالي النهضة تتحمل المسؤولية ويلزم تتحاسب، لكن المشكل لهنا أنو كل ملف يتجبد ويدفعولو القيادات متاع حركة النهضة ما يتواصلش في مآلات جادة، توة هاو الملف الكبير متاع التنظيم السري ما نعرفش شنوة آخر بعد اللي صار والحديث اللي تم وكذا شنوة التطورات اللي فيه، نفس الملف هذا، أنا وليت في ملفات في علاقة بحركة النهضة وقياداتها بعد 25 جويلية هي ملفات غير جدية إلى أن يثبت عكس ذلك"...