علق طارق الكحلاوي كرونيكور برنامج في 90 دقيقة على إي أف أم، اليوم الاثنين 28 نوفمبر 2022، على تقديم الأستاذ في القانون الدستوري لكتابه الجديدة وما رافقه من تصريحات.

وقال الكحلاوي:" بالنسبة ليا أي حد يكتب كتاب على تجربتو هي بالأساس حاجة إيجابية قبل كل شي، مهم جدا توثيق هالتجارب هاذيا ونخرجو مالثقافة الشفوية، باهي أنو يخرج ويحطلنا سرديتو للي حصل اللي انجمو نتحاسبو بيها بشكل واضح هو آش قال بالضبط ما انجمش لا راهو مش هاذيكا الكلمة اللي استعملها واضح آش كتب وعلى الأساس هذاكا يصير نقاش جدي على أساس الكتيبة مش الثقافة الشفوية، لكن في المقابل السيد أمين محفوظ وهو قامة علمية في اختصاصو في القانون الدستوري، لكن في نفس الوقت أنا يظهرلي دخل في السياسة ولا يريد أن يقر أنو دخل في السياسة، هو كان قعلا في مجموعة استشارية قريبة من رئيس الجمهورية، ورئيس الجمهورية عندو أكثر من حلقة استشارية، منهم مجموعة قربها نظرا لخلفيتها القانونية في القانون في الدستور في غيرو، منها السيد أمين محفوظ والعميد السابق بلعيد والسيد بن عيسى، هاذوما الثلاثي اللي شفنا لقاءات متواترة بينهم وبين الرئيس، وخلي نقولو الأمر 117 اللي هو عمليا رسخ وضعية مخالفة الدستور اللي تمت في الـ25 جويلية، لأنو كي تقول ما عندكش علاقة بدستور أوت 2022، لكن انت عندك علاقة بالأمر 117، تقول انت ضد الاستبداد والحكم الفردي، لكن انت رسخت الحكم الفردي في الـ117، عموما سرديتي كانت فما مجموعة ربما اعتقدوا بحكم زملاء سابقين لقيس سعيد، أنهم قادرين يحتويوا قيس سعيد أو يزلبحوه بالدارجة، هذاكا هو راهو نحنا أساتذتك وزملائك القدم، كانت فما علاقة متاع تحايل متبادل هو حاشتو بيهم لخلق إطار نخبوي، لأنو تعرف أغلبية النخبة السياسية والاجتماعية خذات مسافة من مسار الحوار الوطني، كان يحتاج نوعا ما غطاء نخبوي ما يوصل بيه، لكن حتى الغطاء النخبوي هذاكا ما نجمش يتوافق معاه في اللخر لأنو هو كانت عندو رسائل واضحة في الدستور وخاصة على مستوى النظام السياسي في علاقة بنظام رئاسي واضح، وخاصة ما كانش مستعد ينجم يمشي معاهم في مسألة الهوية، أنك ما تنصصش على علاقة تونس بما هو عربي وإسلامي هاذي حاجة قيس سعيد ماكانش مستعد ينجم يمشي فيها، ونعتقد اللي فصل بيناتهم هو الفصل هذاكا هو إصرارهم على أنهم يأكدوا على حاجة من النوع هذاكا".