أكد عبد الرزاق الخلولي عضو المكتب السياسي لحراك 25 جويلية، اليوم الجمعة 2 سبتمبر 2022، خلال حضوره في برنامج في 90 دقيقة على إي أف أم، أنه لا يمكن تشبيه لجان اليقظة الذي قرر الحراك إرسائها بما يعرف بلجان حماية الثورة.

وقال الخلولي:" لجان اليقظة اللي قررنا نعملوها لا يمكن تشبيهها بأي لجان في أي إطار آخر، لا يمكن تشبيهها بأي لجان أخرى كانت في الماضي، لأن المسألة بالنسبة لينا لا تتشابه والتاريخ لا يعيد نفسه والظروف ليست هي نفس الظروف اللي كانت قبل بش تعمل لجان الثورة ولجان حماية الثورة هذا الكل ما عادش موجود... اثنين أحنا نعتمدو على معجم عربي للغة، إذا كان اللغة تقول عنا لجان يقظة، هاذي لجان، أحنا شفنا كونو فما تجاوزات كبيرة وكونو فما إخلالات من طرف عديد المسؤولين وأنو فما تراخي في المجهود والعمل وفما إهمال لمصالح وخدمات المواطنين وهذا الكل موجود، وكل مرة نسمعو هاو معتمد وهاو والي تعدا للقضاء، نحنا باعتبار أنو انتشارنا كان كبير في كافة جهات الجمهورية فإنو عديد المواطنين يجيبولنا تشكيات أمام المسؤولين أو من عناصر أخرى أو من مؤسسات... هذه اللجان هي عنصر من عناصر نشاط وسياسية حراك 25 جويلية، نحنا نتحرك فعليا وننفذ ما انظروش، عملنا اللجان هاذي باعتبارها عنصر من نشاطنا، العنصر هذا هو الالتصاق بهموم ومشاغل المواطنين ونكونوا قراب منهم، نتقبل منهم شكاياتهم ونرفعوها للمسؤولين، أحنا فما مسؤولين متجاوزين أحنا فما تشكيات تجي مالمواطنين مش أحنا بش نمشيو نراقبوهم، أحنا نتقبل الشكابات ونرفعها للسلطات المختصة ونفوض لهم اتخاذ الإجراءات اللازمة في معاقبتهم، سميناها لجان يقظة حتى نكون متيقظين لما يحاك لإفشال مسار 25 جويلية باعتبار أن هذه التجاوزات متعمدة وتصب في هذا المصب... رفعنا بعض الشكايات وبلغناها لعدة وزارات وهناك بعض الشكايات اللي مشات للسيد رئيس الجمهورية والحقيقة لقينا صدى وكونو فما بعض المشاكل والتجاوزات اللي قاموا بيها مسؤولين خذاو فيهم قرارات ووقع عزلهم... لجان اليقظة لا تهتهم وماهيش موجهة لا للخصوم ولا للسياسيين ماناش عنصر وشاية متاع الناس هاذوما ولا عنصر لملاحقتهم ولا حتى شي، نحن نعتبر كل الأطراف الموجودة في تونس أطراف شرعية ولها الحق في حرية التعبير وحرية التنظم وحرية التحزب، نحن لا نستهدفهم وكنت نفسر أنو اللجان موجهة لخدمة المواطن".