اعتبر الأمين العام لحزب الاتحاد الشعبي الجمهوري لطفي المرايحي اليوم الاثنين 31 أكتوبر 2022، خلال حضوره في برنامج في 90 دقيقة على إي أف أم، أن مصر فقدت استقلاليتها الاقتصادية وأصبح لديها كوميسيون مالي، محذرا من نفس المصير بالنسبة لتونس إذا واصلت السير في نفس التمشي في علاقة باتفاق صندوق النقد الدولي.

وقال المرايحي:" نحب نقول اللي قاعدين نعيشو فيه أهم من الانتقالات أو الأحداث اللي صارت الثورة ولا 25 جويلية، أهم منهم بكثير وهذا بان بالمكشوف لأنو كي تشوف بلاد اللي تشبهلنا توة اللي هي مصر واللي هي ولات تحت الحماية والوصاية الدولية، يعني مصر توة عندها كوميسيون مالي وفقدت الاستقلالية الاقتصادية متاعها، إذا كان أحنا مكملين بش نفقدو الاستقلالية متاعنا فيا خيبة المسعى الحكايات الكلها ثانوية، هاذاكا علاش حاولت أني يكون التركيز متاعي أساسا عالموضوع الاقتصادي، لأن الحديث في المواضيع السياسوية ماهيش سياسية لأنو السياسية تعني الحديث في الأفكار والخيارات والتوجهات، أما فلان عمل وفلانة عملت والحزب الفلاني متهم وكذا هكاكا راهو مش هذاكا اللي يخرجنا، واليوم أحنا راني نحب نقول للتوانسة قاعدين تسمعو في حاجات اللي في تقديري بعيدة على الصواب تماما، شنوة فما في تونس، في تونس اللي مش قاعدين نتحدثو عليه وكأنو عنا زوز اقتصادات، فما اقتصاد يمشي بالدينار أشياء نشريوها بين بعضنا بالدينار، وثما أشياء ما تجي كان بالعملة الصعبة وقت تقلي قمح نعطيك أنا الدينارات اللي تحب عليهم الأكوام الكل ما يجيبولكش القمح متاعك، كي نقلك المحروقات مكش بالدينارات بش تمشي تهزهم يلزمك تهز ما يعبر عليه بالعملة الصعبة هاذيا العملة الأجنبية بش تجيب بيها، فانت وقت تجي تقلي أنا والله المشكل متاع دعم، انت مواطنة تونسية أنا توة بش نرجعلك الخبزة بدينار وانت بش تخلصني دينار، هوكا رفعت عليك الدعم، باهي لكن أنا الدينار اللي خلصتني بيه بش نهزو للمورد متاع القمح بش نقلو هاو بربي الدينار أعطيني بيه قمح، لا، مالا هالهراء اللي قاعد يصير سامحني في الكلمة اللي هي قوية شوية لكن في هاللغط اللي قاعد يصير في المنابر والدعم والدعم، على المفاهيم هل هي أولوية... القصد ثانوي شنوة، فما برشا حاجات مش قاعدين يقولو فيها للتوانسة وأنا نرا اقتصاديا على الأقل إذا كان فما ناس أخرى عندها راي حقيقة، خاطر نشوف في شي، ناس في جرت بعضها تردد في نفس الشي، عنا راهو صندوق النقد الدولي فارض علينا إصلاحات مؤلمة، هات نشوفوهم الإصلاحات الساعة وهل ترى حقيقة هي إصلاحات وإلا لا، والعباد تكرر، إذن حكاية الدعم كأنو أحنا وقتلي بش نرجعو حقيقة الأسعار الوضع الاقتصادي متاعنا بش يتحسن مات فما حتى علاقة، أنا وقتلي نقول موضوع ثانوي مش تأثيرو على الناس تأثيرو على الناس سيكون كارثي، موضوع ثانوي بالنسبة للناس اللي قاعدة تتحدث فيه في المنابر الإعلامية والناس اللي هي تدعى كخبراء بش تعبر على آراءها، هالناس هاذيا تتطرق للموضوع يعني هو علبة صغيرة في الماء، قاعدين يتحدثو على موضوع التأثير متاعو بسيط على خاطر الدعم ما يخلق كان حاجة بركا هي تشويه الأسعار، يعني بما أنو ما فماش حقيقة الأسعار فأنا في عوض ما ناخو خبزة نولي ناخذ خبزتين نستهلك يمكن خبزة ونص والشطر لاخر نطيشو اللي بقا نتهاون فيه"...