وجه مختار الخلفاوي كرونيكور برنامج في 90 دقيقة على إي أف أم، اليوم الأربعاء 8 جوان 2022، اتهامات خطيرة بالتواطئ إلى عدد من المراقبين في مراكز الامتحانات، لتسهيل عملية الغش وتصوير أوراق امتحانات الباكالوريا وإخراجها بعد وقت وجيز على انطلاق الامتحان.

وعزا الخلفاوي، هذا الأمر إلى انتشار عقلية لدى بعض الأشخاص أسماها عقلية "الترسكية وتدبير الراس".
وقال كرونيكور البرنامج:" الحاصل في بلادنا أنو فما عقلية الترسكية وتدبير الراس من أجل قطع الطريق على تكافؤ الفرص وعلى المساواة والإنصاف بين التوانسة، فما ناس يحبو يرسكيو في كل شي في حياتهم في قرايتهم في خدمهم، كل شي بالتاليفونات وبالقصة، بما فيهم الناس هاذوما، شدو ناس يغشو في مناظرات عليا في مناظرة القضاء بمعنى هاذي عقلية متاع ترسكية وتدبير راس، بالرغم من التراتيب الموضوعة بمنع التاليفونات على كل الناس، المربين اللي يعسوا الإدارة المترشحين والسماح فقط لرئيس المركز أنو يدخل تاليفونو لضرورة العمل، ورغم هذا نلقاو هذه الاختبارات تنشر على مواقع التواصل الاجتماعي بعد دقائق... شكونو اللي يعمل الشي هذا، من خبرتي نعرف بش تصور ورقة تأخذ راحتك فما تواطئ ما، صحيح فما وسائل أخرى اللي هي المنقالة ولا القلم الالكتروني، ولكن الحقيقة القلم الالكتروني أنا نسألة جماعة المنتصف باي نقلهم جبتوش منو، قليل أكثرها تاليفونات، ومصور واحد واخذ راحتو هل انت في قاعة فيها 10 12 مترشح وزوز مراقبين يعيسو عليهم واحد مالقدام وواحد مالتالي واحد يهز تاليفونو، أنا كان نعمل حركة كيما هكا تاو يشوفوها الناس الكل، إذا فما مشكلة في مكان ما ومانحبوش نسميو أصل الداء، فما تواطئ في قاعة الامتحان تلامذة مراقبين، وحتى كي يتم تطبيق القانون على بعض المخالفين بحرمانهم، اللي يتشد في محاولة غش أو غش عندك سحبو من الدورة اثنين تحجير الترسيم في الباكلوريا 5 سنين إذا عمل هو عنف ولا كلام بذيء يتم تتبعو جزائيا وكل عام فما الحالات هاذيا ونعرفها بالمئات، آش يحصل كل ما تحصل المئات هاذيا تكثر التدخلات في كل بلاصة بما فيها تتنصب موائد إعلامية للدعوة إلى الرفق والرحمة بهؤلاء الأبناء المخطئين وسيبوهم ميسالش، إذا يا إما نحرصو على تكافؤ الفرص والمساواة بين الناس الكل ونعاونو وزارة التربية في تطبيق القانون وإلا عين رات وعين ماراتش وبعد نقعدوا نحكيو هاو تسريب وكذا وأين الجدية إلى آخره"...