وقال الشواشي:" الناس الكلها تعرف أنو الخيانة والتآمر على أمن الدولة والتخابر مع جهات أجنبية وجهات مشبوهة والمتاجرة في المخدرات هذا الكلام اللي قالوا السيد رئيس الدولة هاذي تعتبر جنايات ويعاقب عليها القانون التونسي وأنا رجل قانون والسيد رئيس الدولة رجل قانون، وبالتالي اليوم أنا قررت أن أذهب للقضاء لأنو رئيس الدولة عودنا أنو يتكلم دون ملفات، يتكلم فقط بغاية تشويه خصومو بغاية تصفية حساباتو مع خصومو وبغاية ضرب خصومو قدام الرأي العام في مصداقيتهم ووطنيتهم، وبالتالي هو كل من يختلف معاه يعتبرو خاين ومتآمر مع الخارج، أنا ماشي للقضاء بش نقدملهم تصريح رئيس الدولة ونطلب منهم يفتحو تحقيق ويثبتولنا كان رئيس الدولة كلامو صحيح خلي هالناس المتآمرين يتحملو مسؤولياتهم والقضاء يسلط عليهم العقوبات اللازمة وكان الكلام هذا مجاني وفقط لتشويه خصوم رئيس الدولة يلزم رئيس الدولة يتحمل مسؤوليتو، تعرف أنا كنت ضحية لمثل هذا الكلام وتفتح تحقيق وحفظت التهمة وكل مرة رئيس الدولة يعاود يكرر، اليوم انتوما كإعلام مادام هو يتكلم طالبوه خلي يقدم الملفات للقضاء، كان أحنا متآمرين وخونة ونبيعو في المخدرات في جينيف يمشي يشكي بينا... انتوما تعرفونا أحنا صادقين وهو اللي ما عندوش الصدق لأنو نحنا تعودنا عليه راهو عنا 3 سنوات مع السيد قيس سعيد ونفس الخطاب قاعد يتكرر، أعطيني مرة وحيدة اتهم فيها شخص واتضح أنو اتهامو في طريقو وأنو الشخص هذاكا تمت محاكمتو وثبتت إدانتو، السيد رئيس الدولة للأسف الشديد هو يستغل المنصة والمنصب اللي عندو يطلع على جبل بوقرنين ويبدا يلقي في الاتهامات على خصومو السياسيين كيما ترا، في حين أنها مناسبة للاحتفال بعيد الشجرة، مناسبة أنو يمشي لجرجيس ويواسي أهالي الضحايا ويقول راهو فما دولة حاضرة وقادرة تواجه الأزمة متاع الهجرة غير الشرعية والناس اللي تموت في البحر، كان مالمفروض عليه يمشي لصفاقس ويواجه أزمة الزبلة اللي اليوم تعاني منها، والأهالي اليوم عايشين حالة كارثية بالنسبة لصحتهم وصحة أبناءهم، طالع للجبل يسب في الخصوم متاعو ويتهمهم بأشياء غير حقيقية ونتحداه كان الشي اللي يقول فيه صحيح يهزو للقضاء ويقدم ملفات تبارك الله عندو استخبارات الأمن وعندو الاستخبارات العسكرية وعندو جماعتو موجودين داخل السفارات في كل أصقاع العالم، يتفضل يقدم ملفات ويثبت الادعاءات اللي يقول فيهال وخلي الشعب يثبت من الصادق من الكاذب"...