وقال جلول:" اللي يقلقني اللي نحكيو فيه عالدستور راهو التوانسة ما يهمهمش، اليوم آش فما في البلاد أولا فما الاقتصاد اللي هو الكارثة، وفما إنكار تام ع الاقتصاد صار هكا في لبنان راهو ما نحكيوش ما نعملوش نخبيو وفجأة نطيحو... فما أرقام تعطي فيها الحكومة غالطة، على الأقل بن علي كان كي يمكيج يمكيج بالباهي، تقلي نسبة البطالة تراجعت والاستثمار ما فماش، الشريك الاقتصادي متاعنا عايش أزمة، اليوم نسبة التضخم تقلي 8 بالميا وأنا متحقق اللي هي أكثر، كان نعملو على سلة كيما اللي يعملو فيه نحنا نعملو على سلة متاع ناس قبل، اليوم فما إنكار تام والسيد الرئيس يحكي على العلو الشاهق، اليوم ما فماش دواء في الصيدليات، أنا عندي دواء ناخذ فيه ما لقيتوش، ما فماش ايسونس تمشي لكيوسك يقلك برا امشي للي بعدي ممكن تلقا عندو، اليوم ما فماش شادلية، القهوة من عهد أبو الحسن الشادلي ما تقطعتش، اليوم نعيشو بلاش شادلية حاجة مهمة نحييو بيها نحفلو بيها، اليوم هاو الواقع شنوة، اليوم نحكيو على العلو الشاهق وعلى تحسن، 70 بالميا مالتوانسة يحبو يغادرو البلاد، اليوم الناس اللي تحرق ماعادش البطال، اليوم بشهريتو ومترسم، اليوم فما حادثة صارت حتى واحد ما حكا عليها وهو كي الشاب واخذ الباك حارس ناجح وحرق، اليوم عندك موظفين يحرقو ونائب رئيس بلدية يحرق اليوم فما عدم ثقة رهيب في البلاد ومن جهة الخطاب الرسمي علو شاهق، فما مشكل"...