وقال الرقيق:" حكاية وصول الفضلات للميناء ترجع لشهور لتالي، حكاية الميناء راهو وين تجي تلوم تعذر، تعرفها تأتي الرياح إليك من كل الجهات الأربعين، ما عندك ما تعمل، سي رئيس البلدية الموقر، كان عندو مصب القنة متاع عقارب اللي هو فات طاقة استيعابو من 2013 قعدو يخدمو بيه سبحان الله بالإعجاز القرآني ولا بالإعجاز متاع أي دين في العالم بعد 25 جويلية ظهر سايي ما عادش يستوعب، يتسكر، تسكرش هو، جاو الخبراء لقاو أرض دولية قبل المحرص بش يحطو فيها الفضلات المجتمع المدني متاع المحرص عملو تنسيقية وقفو ما فماش، لقاو بلاصة في بوثدي منزل شاكر المجتمع المدني وقف ما فماش... عملو الميناء كمصب وقتي وفي الأثناء عملو لجنة استشارية، بين قوسين الحل اللي تلوجو عليه الكل عملتو اللجنة الاستشارية اللي عملتها الولاية، فما سي جلال بوزيد رئيس اللجنة حكا عليه واتفقوا عليه مجتمع مدني والدنيا الكل نقابات وكذا، بش يعملو مالمفروض 4 مجمعات ولا 3، يعني صفاقس تتقاسم الأعباء، في صفاقس الشمالية فما مركز تجميع في صفاقس الجنوبية مركز تجميع، في صفاقس الغربية فما تجميع إلى غير ذلك، وبش يجيبو شركة عندهم مشروع كامل لرسكلة النفايات هاذيا لكن وقتاش هذايا تحبلو 5 ولا 6 شهر القدام، باهي الـ5 ولا 6 شهر القدام وين بش تصب الزبلة لا تنجم تصبها لا في سوسة لا في قابس لا في نابل لا في مدنين لا في تطاوين، ما تنجم تصبها كان في صفاقس، كل مرة يجيو يمشيو لبلاصة يلقاو تنسيقية قدامهم توقفهم، معناها اليوم انت عندك الوالي سي الفخفاخ اللي عملو ضدو مسيرة نحينا سي الفخفاخ وهو بشر قابل بش يتنحا حتى بعد درجين، جبنا سي الرماح ولا سي عبد الفتاح بش يعاودو يقعدو بش يقولو وين المصب تهبطلهم تنسيقية تقلهم حتى واحد ما يصبلنا الزبلة في كذا، آش عملو ولات حكاية الميناء ولات آخر الطب الكي ودخلنا في الموضوع هذا ، إذن هذا موضوع صحيح بيئي لأنو لو كان بش نحكيو على صفاقس وقابس الجريمة البيئة بدات من عام 70 من الصناعات الكيميائية الملوثة، ولكنو موضوع صفاقسي صفاقسي في المستوى الجهوي بمعنى يجب أن يكون هناك مصب للفضلات في حدود ولاية صفاقس ما نجموش نجيبو والي فضائي يطلعو للفضاء، علاش سي جلال بوزيد آش طلب من الدولة، طلب منها تأمين البلايص اللي اختارتهم اللجنة كمصبات، يقلك أنا في عوض ما يجيو يعرضولي أنا التنسيقيات، انت كدولة تتحمل مسؤوليتك بقوتك وأجهزتك بش المصب هذاكا تفرضو تفرضو، ولات تسيب وولات ناس بين قوسين أنا صفاقس بلادي وجرجيس بلادي، أنا شفت مسيرة الولاية شفت فيها احتجاج تلقائي متاع مواطنين تخنقوا صحيح، وبرشا محتجين شرعيين، وشفت فيها محتجين أخرين، جايين فقط بش ينحيو الوالي إي كي بش تنحي الوالي بش تجيب مصب ولا ما تجيبش مصب؟ والوالي اللي بعدو.. وفما اللي جاو فقط بش يوريو اللي سلطات قيس سعيد راهي عبات البلاد بالزبلة معناها مخلطة حتى المحتجين مخلطين، يلزم أبناء الجهة يلقاو حل لجيهتم، هوما لفاو كيفاش يتنفذ وكيفاش نصبرو عالخمسة ستة شهور، ونفرضو مصب يتصب فيه الزبلة مهما كانت الظروف والتكاليف لأنو حتى شي ما هو بش يستوعبنا لا بحر الميناء مشا، إذا بش ترمي في البحر الثروة السمكية مشات، إذا بش تحرق العباد بش تتخنق، شنوة بش تعمل صفاقس كيفاش تعمللها، هاذيا مش وزيرة بيئة راهو، مش رئيس دولة وكذا، هذا موضوع صفاقسي صفاقسي يلزم يتحل غادي وبعد السلطة مهمتها تنفذ الإرادة متاع أهالي صفاقس، تجيب القوة العامة بش تفرض المصب هذايا يتصب فيه الزبلة ولا ما يتصبش، أراضي دولية بعيدة عالسكان راهو.. فما النعرات المحلية وفما الناس الكلها أبطال وفما شكون يتطاول على الدولة"...