وقال بن حميدة:" ياخي هاذم خدامة وإلا لا، خدمو شهر كامل وإلا لا، عندهم الحق بش ياخذو شهرياتهم وإلا لا، نعلمك الخدامة هاذم وعايلاتهم، وقت أحنا عدينا راس العام مع بعضنا وصرفنا زايد شوية وكذا هوما ما عندهمش بش يشريوا شوة كاكوية بش يحطوها مع التاي، لأنو ما خذاوش شهرياتهم، شهرية ديسمبر ومنحة نهاية السنة مش خالصة، إي منين بش يعيشو هاذم، تقلي انت مع العودة المدرسية، إي هاذم بيدهم عندهم أولاد راهو اللي بش يمشيو للمدرسة واللي ما نجموش يعديو راس العام بفرحة، المشكلة متاعهم هوما وإلا مشكلة سوء حوكمة متاع الإدارة متاعهم، راهو راس الشهر ما يغدرناش ونعرفوه وقتاش يجي، والمؤسسة اللي تحترم روحها ما تسمحش لروحها بش ما تخلصش خدامتها في شهاريهم، خاصة الظرف المضاعف المشدد، أنو رانا في العام تجينا مناسبات، اللي مش ممكن ما تلقالهمش حل بالمسبق، عندك العيد الكبير، العيد الصغير، العودة المدرسية، بداية شهر رمضان وراس العام، هاذوما مناسبات تعرف اللي التوانسة الكل يهتمولها على الأقل في المناسبات هاذيا ترد بالك بش ما تصيرش مشاكل... الميساج وصل لينا أحنا التوانسة أما ما وصلش لإدارة المؤسسة لا لوزارة النقل ولا لرئاسة الحكومة، الدليل أنو لحد اللحظة ما فماش تحرك...عمليا راهو الدولة مسؤولة على توفير خدمات أساسية لمواطنيها راهو التربية والصحة والنقل راهم مالخدمات الأساسية اللي مجبولة عليها الدولة، الدولة تبعث فرقة متاع بوليسية تعمل سطو مسلح على بانكة، بش تخلص شهرية شركات النقل لأنو يلزم النقل ما ياقفش باهيش هكايا.. أنا نقلك ماهوش مسموح بش أنو شركة نقل عمومية ما تخلصش خدامتها وياقف النقل، هاذي مسؤولية الدولة قبل كل شي أعمل اللي تحب وألقى طريقة اللي تحب عليها أما يلزم الكيران والتروينوات تقعد تمشي، السبيطارات والمكاتب يقعدو يمشيو"...