وأكد الملولي أن المجتمع المدني بالجهة قدم عدة حلول ومقترحات لوزيرة البيئة، إلا أنه لم يتم اتخاذ أية قرارات في الغرض.
وفيما يلي أبرز ما جاء في شهادة الناشط في المجتمع المدني:" الميناء فيه مصب للنفايات ونذكرو رئيس بلدية صفاقس قرر لأنو كان مغلق قبل القنة كان هذاكا المصب، قرر يتحل على شهر وجمعة من نوفمبر نوفمبر تعدى خرج دخلنا للعام الجديد تعداو علينا 4 فصول والدولة ما حركتش ساكنا اجتماعات تكلمنا حتى كي انسقو مع وزارة البيئة تقلنا الحل عندكم، هاو الحل عنا احنا اليوم يد وحدة وطلبنا من رئيس الحكومة ومن رئيس الدولة قبل ما يكون إقرار اضراب عام نهار 2 جوان، تحركات في الأسبوع هذا ونداء للرئيس نقولولو صحيح استشارات وإصلاح القضاء وإصلاح اللي تحب عليه لكن اليوم حطو ساقيكم في القاعة وشوفو فما ولاية المليون و500 ألف ساكن اليوم يعانيو محتقنين حاسين أنهم متروكين وهذا ما عادش يتواصل بالكل...
عنا عديد المقترحات ترفعت للوزيرة عنا خبراء سي جلال بوزيد، عنا خبراء توانسة من ألمانيا عملنا اجتماعات افتراضية عن بعد، عطينا حلول ومقترحات وقلنا فما مصانع اسمنت قبلو يحرقو والنقل يتم عبر السكة الحديدية وبأرخص الأسوام، عطينا حلول وما قعدناش نخرجوا ونتكلمو وأكهو، فما أراضي دولية وكبيرة بعيدة، لكن الدولة عليها أنها تبعد على المناطق السكنية وتفرض أنو اليوم معادش الحلول متاع المصبات والتلوث اللي صار في القنة واللي كان بش يصير في برشا بلايص، انو اليوم نبداو بالفعل، لا البلدية حبت تغير العقلية وتمشي في الفرز الانتقائي، اليوم 8 شهور يمكن زوز بلديات بدات تحسس، لكن البلديات الكبرى الكل قاعدين نستناو حتى يجينا حل من تونس، الرصيف تقلع بالجرافات أعمدة إضاءة محروقة فضلات محروقة علامات مرورية روضات، الوضع ولا كارثي مع السخانة ديارنا مسكرة، ما عادش انجمو نحلوها مالحرايق في الليل والنهار، صفاقس الكل، واليوم كي تمشي مثلا لعقارب وين كان مصب القنة يعانيو في معاناة كبيرة، اليوم الأسواق تحولت لمصبات في وسط البلاد، النوادي ودور الثقافة معبية بالزبل، اليوم وصلت متساكنين تحتجز في كماين لأنو فما مقاولين خواص يحب يخدم، شاري كماين ما فماش مصبات ياخو يهز ويطيش في الأراضي، اليوم وصلو تهديد الأمن والسلم الاجتماعي كماين وجرافات تحجزت وتقلبت من قبل المواطنين نظرا لارتفاع حالة الاحتقان...
في البيان كان تشوف في النقطة الأخيرة قلنا نداء لوزيرة البيئة التخلي فورا على مقترح الاستشارة لأنها كيما اللجان اللي تحلت في عديد المناسبات سواء في المشاكل البيئية والأزمات والحوادث وحالات الإرهاب الكلهم لجان، الاستشارة ما عادش عنا وقت وقتاش بش تلمد العباد ما عندهش حلول في أيديهم لأنو يقلك عقارب اليوم مش قابلة وليماية مش قابلة صفاقس مقسمة، يا سيدي اليوم بينالكم بالبيان انو صفاقس يد وحدة اعطيونا انتم كوزارة بيئة وكرئاسة حكومة وكرئاسة دولة شنوة بش تعملو للجهة هاذي...

اليوم المعتمديات تتصل وعملنا هاشتاغ اليوم تحرك، صفاقس تتحرك تحرك، عملنا نداءات للتحركات السلمية اللي هي بالتنسيق مع الجميع ما فماش قيادة، من تنسيقية بيئة من جمعيات من حركات ومنظمات اليوم تشوف المحاماة الرابطة الأولى والثانية، كي تشوف نقابة الاعلام اليوم الكل الوضع يمس الأنشطة الثقافية اتحاد الفلاحين اتحاد المرأة، الكل ما عادش تنجم تعمل تظاهرات آخر معرض عباد ما عادش تنجم تمشيلو لأنو قريب للمصب اللي هو فوضوي وعشوائي تحل على شهر اليوم عندو 7 شهور وأحنا نراكمو وساعات يشعل بقدرة قادر ما تعرفش منين يقلك برباشة وهوما بش يتخلصو مالكميات، اليوم الوضع ما عادش يحتمل وهذا علاش توجهنا لرئيس الدولة، ولاية صفاقس نذكر ما عناش والي، الوالي الثاني يقال في أقل من 9 شهور، ماعناش والي، الشخص المباشر اللي نتعاملو معاه هو المعتمد الأول يخدم باللي ينجم لكن القرار مش في صفاقس مش جهوي، من أعلى هرم في السلطة اليوم يلزمو يتدخل وينصف الجهة هاذي اللي خلاوها 9 شهور تفاهمنا في البداية قلنا حكومة جديدة وجات معانا الوزيرة في نوفمبر لكن ما قيناش فما حلول، يا خويا اللي ما عندوش حل يخلي بلاصتو لغيرو، لأنو خبيرة الوزيرة وتعرف كل شي اليوم مش ندخلو في السياسة وما عناش عركة سياسية بالكل، صبرنا وتفاوضنا لكن اليوم عايشين في قمامة صغارنا اليوم أمراض حساسية تسكر دارك كليماتيزارات الضو مقصوص على برشا جهات الماء مقصوص أمس وأول أمس تسيب الماء، علاه عايشين في العصور البدائية هاذوما ولا كيفاه؟.