وقال الكحلاوي:" واضح نحنا في إطار تسخين الأجواء، آش قلت ولت البارح، عنا وضعية الرئيس أزاح الاتحاد مالملف السياسي دزو للمربع الاجتماعي، موازين القوى ما تسمحش للاتحاد أنو يعلي السقف ويتعارك مع قيس سعيد على الموضوع السياسي، هذا تبين اللي مش ممكن من قبل الاستفتاء وأنو كي شد صحيح في علاقة بالحوار الوطني بالطريقة هاذيكا وعلا السقف في اللخر ما ربحش المعركة هاذيكا، تقهقر الاتحاد للمربع الاجتماعي وبش يتمترس غاديكا وبدا يعلي الصوت عموما لأنو كيف ما قال، يحبوا يفصلونا على قواعدنا كان بش نصححوا يقلهم أيا هوما موافقين وبالتالي كي قواعدكم بش يتمردوا يتمردوا عليكم انتوما، يحبو بمعنى آخر يحشونا ماللوطا، بمعنى أنو ما عادش يولي عنا وجود شرعية نقابية وقت اللي أنا صححت، وبالتالي يقلك أنا مش على سواد عيني يحبني نصحح مش بش يورطني، الهدف هو توريطي في المرحلة القادمة، لكن أنا متمترس لهنا وبش نخوض معركتي في المربع الاجتماعي، لهنا طبعا فما السياق العام هذا، السياق اللي يعرف الاتحاد اللي الوضعية الاجتماعية مش بش تكون ساهلة، بش يلعب ما يعتبرو دورو التاريخي في الدفاع عن الفئات المهمشة، لكن مش فقط المهمشة، توة تحكي على الطبقات الوسطى على مجمل القطاعات اللي يغطيها الاتحاد العام التونسي للشغل نعرفو حتى الأطباء عندهم نفابتهم داخل الاتحاد يعتبر أنو معني بحماية كل هؤلاء، وربما فما حديث حتى للذهاب للي خارج التأطير الرسمي متاع الشعل، الاتحاد يحب يلعب الدور هذا طليعة الفئات المهمشة، لكن في نفس الوقت فم السياق الخصوصي اللي ما يلزمناش ننساوه، اليوم فما انتظار كبير مالكواليس متاع الاتحاد، الطبوبي كي عمل تصريحات البارح يعرف جيدا اللي اليوم نهار الخميس هي جلسة النطق في خصوص قضية مؤتمر الاتحاد... اللي حسمها الحكم الابتدائي لصالح الشاكين بمعنى أنو المؤتمر غير شرعي... وطبعا نور الدين الطبوبي وقيادة الاتحاد الحالية مستحيل كان ما تتعاملش مع حكم المحكمة بالسلب أو الايجاب خارج الإطار السياسي، بالنسبة ليها القضاء هو تحت سيطرة قيس سعيد هذا تصورهم وقالوه بشكل من الأشكال وقت زارو القضاة وقت الاعتصام متاع القضاة ووقتها صار التأجيل قالو صار ضغط على القاضية المعنية بالملف وتأجل البت فيه، إذا هاذي بش تكون كيف ما تقول لغم كبير وكبير جدا"...