وكشف الكحلاوي أن مصادر دبلوماسية أوروبية مقيمة في تونس بدأت في تداول الخبر منذ يوم الاثنين الفارط، مرجحة أن يكون قد تم اتخاذ القرار لسببين اثنين.
وقال كرونيكور برنامج في 90 دقيقة:" خلينا نقولو توة بالنسبة لموضوع التأجيل بين قوسين، علاش التأجيل على خاطر هنا شنوة عنا بش نذكروا بمسار الأحداث، عنا اتفاق خبراء وقتلي تعمل دخلنا في مرحلة جدية، هاذيكا النقطة الأولى متاع الاتفاق النهائي، اتفاق الخبراء اللي صار في 15 أكتوبر، والطرف التونسي كان يعرف من قبل وضع تونس في 19 ديسمبر، سمير سعيد وزير الاقتصاد عندو الموعد هاذاكا من فترة وأعلن عليه هو، تونس كانت تعرف روحها بش تتحط في 19 ديسمبر في الجدول وتحطت قعدت أسبوع وتنحات البارح بكري، خلي نقولو وهذا من مصادر دبلوماسية مقيمة في تونس، أنو من نهار الاثنين الخبر متاع تأجيل الاتفاق مع تونس كان موجود داخل الأوساط الدبلوماسية هاذيا، هذا فقط بش نقول اللي هذا قبل الزيارة متاع قيس سعيد، مش معناها زيارة قيس سعيد لواشنطن كانت ناجحة.. أما حبيت نقول بدات تتشكل معطيات لدى الأوساط الدبلوماسية خاصة الأوروبية أنه سيتم تأجيل عرض الملف من نهار الاثنين على الأقل، زوز أسباب تذكرت، السبب الأول هو في آخر البيان متاع اتفاق الخبراء في آخر فقرة يقول أنو على المجموعة الدولية أن تلعب دور أساسي لتسهيل برنامج الحكومة التونسية من خلال أنو يسيبو بسرعة التمويلات الثنائية، يعني بش نفسروا للتوانسة صندوق النقد الدولي مش بش يعطيك كل الفلوس اللي تحتاجهم هو بالأساس دور مش بش يعطيك فلوس ينجم يعطيك الفلوس هاذيكا بش تستعملها، لكن أهم حاجة في الصندوق هو الضوء الأخضر للأطراف الأخرى بش تعطيك قروض بفوائد ميسرة مقارنة بالسوق المالية، آخر فقرة تقلك أنا اتفاق الخبراء متاعي راني عطيتو قبل ما يوفى العام قبل ما تتسكر ميزانية 2022، بش تبدا تأخذ تمويلاتك الثنائية، أنا المرة اللي فاتت كي جبدنا على موضوع الجزائر، قلت فما حديث في الأوساط الحكومية التونسية خاصة اللي عندها علاقة بالجانب المالي والاقتصادي ضرورة توفير 6 مليار دينار بش نسكرو بيهم العام، مشية الجزائر والقرض اللي تخذا ما نعرفوش قداش، فما جهود تونسية قاعدة تتعمل، مشية قيس سعيد للسعودية، ظاهر فما توجه... كان نعملو حاجة مقارنة بش نزيدو نفهمو، مصر خذات اتفاق خبراء بعدنا على الأقل بأسبوعين، تحددلهم موعد قبلنا بنهار ولا بنهار ما تنحاش وبش يتعمل علاش، على خاطر مصر لقات تمويلات ثنائية مباشرة من الأطراف الخليجية بعد إمضاء الخبراء، وبدات حتى في التفويت في حصص في المؤسسات العمومية... يعني كي المرحلة بين اتفاق الخبراء والاتفاق النهائي متاع هانا عطيناك وعد باتفاق توة برة تصرف من خلال الدبلوماسية الاقتصادية بش تجيب تمويلات ثنائية بش تسكر ميزانية 2022، المعطى اللي عندي الأوساط الأوروبية اللي نقلت موضوع التأجيل تقول اللي هذا تونس لم تنجح فيه إلى غاية آخر شهر ديسمبر، ويبدو أنو زيارة قيس سعيد إلى السعودية كانت آخر محاولة لجمع ما يمكن من الفلوس... النقطة الثانية اللي ذكرتو انت توة هو تذكر كسبب مباشر وواضح لعدم عرض الملف التونسي توة، تصريحات الرئيس المتناقضة مع التزامات الحكومة لصندوق النقد الدولي، ومش تصريح واحد.. وفي علاقة بملفات جوهرية في الاتفاق، يعني موضوع الدعم وموضوع المؤسسات العمومية، هذايا خلا أطراف خلي نقولو مرة أخرى صندوق النقد الدولي مش فقط بنك عادي متاع تقنيين، هو أطراف دولية تتحكم في مجلس إدارتو، والأطراف الدولية تقلك شكون هذايا، شنوة معنتها، أنا تجي حكومة نتفقوا على حاجة تجي تقلي لا الحكومة قالتلك أنا ما قتلك حتى شي، وبالتالي كي الموضوع اللي تجبد في فترة ما متاع يلزم الرئيس يصحح اللي ما كانش مطلوب بشكل رسمي، توة يبدو بعد ما عمل التصريحات المتكررة ولا فما يبدو طلب لأنو الرئيس نفسو هو إما يلتزم علنا في خطاب رسمي بدعم مضمون الاتفاق أو بأنو هو نفسو يمضي على الاتفاق...".