وقال الكحلاوي:" نفس اللي صار العام اللي فات، نحنا عنا قانون مالية تكميلي اللي هو مالمفروض يكون صفحات وصفحات، ويكون فما نقاش عليه واسع، يهبطلنا بعد نص الليل في صفحة، فيه 4 وإلا 5 فصول، موجودة فيه بالحسابات، عملو تحيين، عندك تنجم تحسب بالأقراص والأعواد عندك مداخيل ميزانية الدولة عندك نفقات ميزانية الدولة، يقعد فما إلا -، خمسين ألف مليار – 41 ألف مليار يجيو 9 آلاف مليار، حقو يكون تمرين هذا لتلاميذ السنة الأولى ولا الثانية اليوم الصباح، بخلاف الأسلوب هذا كي العادة متاع استخفاف تام بالرأي العام والوضع العام والناس وتسقطلك مالفوق وبرة في الصباح حل تاو تقراه في الواحد، لا نعرفوا كيفاش ولاو 41 لا وكيفاش ولاو 50، لكن فما نوعا ما خبر ربع إيجابي، اللي هو العجز أقل مما كان متوقع يعني اللي هو يبقى ضخم، 9 آلاف مليار و784 مليون هاذيا حاجة ضخمة، إلا أنو بالمنطق متاع الحسابات اللي كانت متوقعة قبل يتسمى أقل شوية، يبدو أنو فما على المستوى الجبائي بعض المداخيل الإضافية اللي دخلت وكانت أكثر من المتوقع، لكن رغم ذلك بش يكون أكثر من العجز اللي كان قبل متوقع بسبب أنو الدينار طاح مقارنة بالدولار وبالتالي الـ9 آلاف مليار ماهيش ال10 ولا ال11 ولا 12 ألف مليار متاع 6 ولا 8 شهور لتالي.. في اللخر منا تشوي ومنا تكوي، اللي يبقا أنو مرة أخرى نحنا محتاجين توة للمسألة الرئيسية قانون المالية التكميلي، بين قوسين هذا الكل هالمالية التعديلي والتكميلي والزيادات اللي بش تتعمل في المحروقات وكل الرزمة هاذيا بش تتهز في دوسي وبش تمشي مع الوفد الحكومي في واشنطن هوما بش يتطلعو على التفاصيل الدقيقة، ثم نحنا ممكن صندوق النقد الدولي يتكرم علينا يقوللنا هاو ميزانيتكم آش فيها، من باب أنو عندو هو قوانين ومبادئ شفافية مش لأنو بش يتكرم علينا أحنا، الحكومة متاعنا مصرة أنو تعمللنا القطوس في شكارة اللي هو الاتفاق هذا لتوة لا نعرفوا التفاصيل الدقيقة متاعو وكيفاش بش يقع تعويض رفع الدعم"...