وقال الشواشي:" الناس الكل مقتنعة أنو قيس سعيد لا يمكن أن يكون جزء من الحل هو الآن المشكل في تونس لأنو الناس الكلها بما فيها الناس اللي تحكم قبل 25 قالو راهو نحبوا نقطعو مع المشهد اللي عايشتو تونس قبل 25 اللي هو كان يتمثل في ديمقراطية مغشوشة ومعارك هامشية لا تهم التوانسة ومؤسسات منتخبة ما كانتش أمينة في وعودها اللي قدمتها للشعب وعلى انتظارات الشعب منها، اليوم حان الوقت أنو نصححو المسار ولكن هذا يكون في إطار احترام القواعد الدستورية ويكون في احترام المسار الديمقراطي اللي تونس رسمتو ليها وناضلت من أجلو أجيال وأجيال بش انجمو نعملو الثورة التونسية 17 ديسمبر 14 جانفي، اليوم السيد قيس سعيد ضرب مباشرة المسار الديمقراطي في الصميم هو اليوم يبشر بنظام فردي وبانفراد بالسلطة هذا أولا، اثنين السيد قيس سعيد كل مرة يحكي بعد الاطلاع عالدستور بما فيها حتى المرسوم، في حين اللي الدستور ألغاه اليوم وكل المراسيم متاعو مخالفة للدستور وتتعارض معه، هو دمر كل مؤسسات الدولة وركز مؤسسات موالية على مقاسو وينتظر منو إنو الناس بش تخدمو وبش تخدم المشروع متاعو... أعتقد السيد قيس سعيد انتهت فترته واليوم علينا كشعب تونسي وكنخب نخمموا في البديل، يلزمو بديل ديمقراطي وطني يقطع مع الماضي يبني على إيجابيات ونجاحات الماضي اللي هي موجودة والشعب التونسي حقق عديد النجاحات ومنها حرية التعبير واللي قاعدين انتوما تمارسو فيها ولا بد نحافظوا عليها اليوم، ولا بد نتجاوزو كل السلبيات والاخفاقات ونبنيو حاجة تشاركية أولا تكون، راهي الديمقراطية تشاركية ودون إقصاء ما انجموا نقصيو حتى انسان خاصة اللي عندو الشرعية الشعبية واللي عندو رصيد شعبي داعمو هذا هو الحل لتونس هذاكا علاش التيار، نحن منذ أكتوبر 2021، مشيت لرئيس الدولة وقابلتو وطلبت منو يشرف على حوار وطني، الحل في الحوار، نتجاوز الحوار سنجد رواجنا في التجاذبات وفي المعارك في الساحة اليوم وفي العنف اللي قاعد ينتشر للأسف الشديد ورينا الملامح متاعو الأولى في قاعات الرياضة ورينا الأوضاع اليوم الاحتقان اللي موجود اليوم في الشارع التونسي، هذا ما انجمو نوقفوه اليوم إلا بحوار وطني قادر إنتو يرسم خاطرة طريق للإنقاذ لأنو اليوم بلادنا مهددة بالانهيار على جميع المستويات".