وقال ترسيم:" قرار الاستقالة مش متاع اليوم عندو مدة يطبخ، شفت بيان هبطتو البلدية باسم المجلس البلدي وأنا عضو بلدي رجعت عليهم على الصفحة، قلتلهم أنا ما عنديش حتى الوقت بش نخرج، تعرفو العودة المدرسية السنة كانت صعيبة شوية نقص في الأساتذة المعهد فيه ما يقارب 1400 تلميذ، نعانو برشا في دخول المدرسة في بداية السنة الدراسية... عنا خدمة، وقتلي نتفاجئ ببيان يتكتب باسم المجلس البلدي، قلتلهم أنا مستشار مجلس بلدي لم أستمع وما عنديش حتى  عالإيميل متاعي وما سوناش التليفون متاعي اللي انتم عاملين مجلس بلدي، وعلاش تتكلمو باسم المجلس البلدي اللي ما عادش فيه حتى نصاب عندو مدة، معناها نمشو في الأمور أنا رئيس مجلس البتات نبيع في البتات متاع جرجيس على أساس أنو البلدية بش تستقات وبطبيعة الحال عندنا موظفين وعنا ناس هاذيكا يلزم الأشياء الضرورية، معناها الأمور المالية ما يلزمناش نوقفوها، اليوم وقتلي أحنا بلغتنا نعكزو تعكيز تجي تعمل بيان مهزلة بعد 24 يوم ياخي ما عندناش مسؤولية أخلاقية ماهو عنا مسؤولية أخلاقية ولا؟، هاذوما أولادنا أنا ولدي ممكن الليلة اللولى ما كلاش لأنو صاحبو اللي توفا محمد أمين مشارك الله يرحمو ويسامحو، معناها تصوري تحسي في الألم يوميا ويزيدو الناس هاذوما متماديين، لو كان فينا ذرة إيمان ونمنوا حتى بالإنسانية ما نقولوش إفريقي لأنوا لكلنا أفارقة في اللخر، أحنا شنوة أوروبيين؟ خرج فلان نسخايلوه إفريقي وأحنا شنوة أحنا؟، الناس هاذوما ماحبوش يفهموا أنو المسؤولية الكلمة بحسابها راهوا لكلها أفارقة راهو، الكلها أفارقة ياخي أحنا م التايلاند جايين ولا من أي مكان؟... أنا ندعو من المنبر هذا خاصة اللي عمل مغالطة نهار اللي خرجو البحارة بش يلوجو النهارات اللولى يقولوا إنهم في ليبيا، هاذوما الكلهم مسؤولين أنا واحد من الناس مسؤول حتى كيف بش أدعى إلى التحقيق أنا نحقق ما عندي حتى إشكال، الناس هاذوما يلزم يتحاسبوا بالفعل، توة انت عندك فاجعة وتمشي تقبر 3 ولا 4 جثث من غير حمض نووي، وبعتالي يطلعوا هوما من جرجيس، معناها عاشوا غرباء في جرجيس عاشوا مقهورين في جرجيس وتزيد تحطهم في مقبرة غرباء ولو أنهم مش غرباء... فما مافيات بالفعل يسترزقوا من هالناس الزواولة، ما نعرفش حتى الـ5 والـ6 ملاين يجيبوا فيهم العباد هاذوما، صدقني كيف نشوف هكاكا نقول سبحان الله، خاصة نسمع مثلا اكس ما عندوش حتى قوت ليلة وتلقا محرق ولدو، ناس باعت ذهبها هاذوما ناس بالفعل في فترة مالفترات خاصة قبل التاريخ ربما بجمعة ولا جمعتين، أحنا نقولو البحر عامر، ويلزم يعملوا إحصائية تعرفي فما أش بش نقلك آلاف ألف، بش ما نبالغش، فما عدد كبير ومهول، شكون السبب فيه؟، السبب فيه أنا نقلك السلط المحلية ببلدياتها بالمعتمد متاعها بالوالي، بكل من هو مسؤول، ياخي ما عنداش تقارير أمنية، ما عنداش شكون يخرج للبحر، ياخي البحارة معروفين اللي يخرجوا للبحر راهو..."