ووصف حجي التهم الموجهة للشواشي بالمضحكة، مشيرا إلى أنه تم تأجيل الاستماع إليه بطلب منه إلى غاية 11 أكتوبر المقبل لإعداد فريق الدفاع.
وقال القيادي في التيار الديمقراطي:" القضية رفعتها وزيرة العدل لكن بتعليمات من رئيس الجمهورية... مرد التهمة أو شبه التهمة المضحكة، هو تصريح في إحدى الإذاعات، اللي قال فيها غازي الشواشي أنو رئيسة الحكومة استقالت أو كانت تنوي الاستقالة والرئيس رفض... التهم الموجهة لغازي الشواشي هي نسبة أمر غير قانوني لموظف عمومي وركزولي على غير قانوني، راهي التهمة هاذي وقتلي تنسب لموظف تقول حاشاكم سرق دلس تحيل، أما كي تقول موظف أو قدم استقالتو ما نتصورش كان استقالة أمر غير قانوني، بش تفهمو العبث، ولا عطينا انكلو ولا نضيقوا على المعارضين فقط، والكلام هذا والعرك بين الوزراء يظهرلي في البلاطو متاعكم يظهرلي قالو هيكل المكي ما عندوش برشا، وراهو مثلا جريدة الشارع المغاربي هبطت مقال طويل وعريض عالكلام هذا، أمر يتداول في الإعلام ويقولو فيه صحفيين وكرونيكارات، حاشتنا بغازي الشواشي فقط خاطرو معارض وحاشتنا بالمعارضين متاع قيس سعيد ... التهمة الثانية اللي هي القيام بتصريحات من شأنها تعكير الصفو العام على معنى المرسوم 115 متاع الصحافة... هو عمل التصريح منا غازي الشواشي سامحوني بش نفدلكو خاطر كثر الهم يضحك وشفنا مظاهرات خرجت في الشارع تندد بالاستقالة ولا تطلب الاستقالة ولا ترفض استقالة نجلاء بودن وتعكر الصفو العام، بربي عندي سؤال أنا شنوة اللي يعكر الصفو العام والنظام العام، اللي قالو غازي الشواشي ولا كي يخرج رئيس الجمهورية يقول حاولو يغتالوني مرة واثنين وثلاثة وأربعة، في مجلس وزاري ووزير الداخلية عاود الكلام هذا، شنوة اللي نجم يعكر صفو النظام العام غازي الشواشي استقالة نجلاء بودن ولا أنو رئيس الجمهورية القائد الأعلى للقوات المسلحة فما شكون يحب يغتالو على كل حال أحنا ما نعرفوش لا شكون يحب يغتالو لا أش عملو معاه هذا... تأجيل الاستماع بطلب من سي غازي الشواشي لإعداد فريق الدفاع عليه كان طلب من سي غازي وقاضية التحقيق أخرت الاستماع ليوم 11 أكتوبر... تنجم تسب معارضيك وتقول عليهم متآمرون وغرف مظلمة وجرذان وكذا أما وزاضح اليوم قول اللي تحب انت، أما نتعداو توة للتصفية وللتهم الفارغة ونحبو نحطو المعارضين في الحبس، اللي يشوف في هذا ويسمع في هذا ما يلزموش يأمن الكلام اللي يتقال من عند السيد رئيس الجمهورية أنو لا مساس بالحقوق والحريات والديمقراطية... أخيرا المرسوم 54 وفصلو 24 راهو انتوما ماهو برامجكم مبعد تهبطوهم عالصفحة والشان يوتيوب متاعكم، أنا كي نجي حذاكم نقول أي حاجة نتحاسب أنتوما تتحاسبو خاطر الفصل 24 يقول مش التصريح برك وفبركة أخبار حتى من ينشرها، يعني حتى الإعلام غدوة بش يلقا روحو ما ينجمش ينشر كلام معارضي قيس سعيد، خاطر بش يتهمهم هوما وبش يتهم الإعلام وبش يطبق عليهم نفس الحكم اللي هو 5 سنين حبس و50 مليون خطية، فقط لأنهم نشروا أو نقلو خبر عن هذا السياسي أو ذاك، إذا كان فما أكثر من هكا تضييق عالحريات وتكميم الأفواه يقولولنا"...