وقال الناصري:" عمري ولا قابلت رئيس الجمهورية وكنت توجهت برسالة مؤخرا السيد رئيس الجمهورية علاش ترفض لقائي، أنا راني مانيش جاي للسيد رئيس الجمهورية طالب ود ولا شكر ولا جزاء ولا منصب، أنا مترفع على كل المناصب، أما كفاعل سياسي في البلاد من حقي أني نقابلك ونتناقش معاك ونتفاعل معاك، اليوم السيد رئيس الجمهورية قاعد يقابل في بعض السياسيين ويخرجو يتكلمو يقلك قابلنا السيد رئيس الجمهورية ولا كلمت السيد رئيس الجمهورية لمدة ساعتين، ولا السيد رئيس الجمهورية ناداني، أنا ما نادانيش هل أنو السيد رئيس الجمهورية هو رافض لقائي أو عندو مجموعة في الديوان هي اللي مسكرة على اللقاءات مع السياسيين ولا يختارو شكون يجيبو وشكون ما يجيبوش، اذا كان فما شكون خايف في القصر من سرحان الناصري نقلهم ما تخافوش راني ما حاشتي ببلاصة حد، السيد رئيس الجمهورية أنا راني داعمك في المسار اللي تعمل فيه للمصلحة الوطنية... أنا اليوم مقتنع شديد الاقتناع أنو اللي قام بيه قيس سعيد هو أحسن شي صار في البلاد والمسار اللي قاعد يمشي فيه صحيح، لكن فما بعض الاخلالات وبعض الهنات نحب نقولهالك مباشرة، قلناها في الإعلام وتكلمت قداش من مرة في الشأن الاقتصادي والاجتماعي والثقافي والسياسي والعلاقات الخارجية والدبلوماسية الاقتصادية، يسمع أوكي، لكن أنا من حقي أني نتناقش نمعاه، أنا نحب نعرف المجموعة اللي مسكرة على رئيس الجمهورية، شكون يعرف شكون عندو في الديوان حتى حد؟، اليوم نحب نوصل أنو الحكومة الحالية هي حكومة تسيير أعمال... أولا أنا قلتها في العديد من المرات، قلت أنو اللقاءات اللي يعمل فيها مع بعض السياسيين ممكن لأنو تجمعو بيهم علاقات صداقة قديمة، سواء زهير المغزاوي ولا عبيد البريكي وبعض السياسيين اللخرين يعرفهم أصدقاؤو من قبل ومن حقهم أنو يتواصلو معاه،  قلت ممكن، لكن قلت زادة مرة أنا نحب نقابل رئيس الجمهورية بش نتكلم معاه، لكن إذا بش يكون بنفس الصيغة متاع اللقاءات أني نمشي بحذا رئيس الجمهورية يستقبلني بش نقعد نسمع خطاب ومبعد نخرج بدون تفاعل وبدون نقاش وبدون الأخذ برأيي فلا داعي من هذا اللقاء، ومازلت شادد فيه صحيح، السيد رئيس الجمهورية عنا حلول راهو إذا كان انت تقابلت وتعاملت مع ناس ما كانوش جديرين بثقتك في وقت ما أحنا راهو نخدمو للمصلحة الوطنية وما عناش حسابات ضيقة، وراهو أحنا نتعلمو كجيل جديد كسياسي جديد مازلت كي بديت الحياة السياسية متاعي، بعد كل شي قداش عمري في السياسة حتى شي شنية تجربتي السياسية، مازلت نتعلم ونمشي وحدة وحدة وما نحبش نستبق الأحداث ما نحبش نحرق المراحل، نحب نمشي ثنية صحيحة على أسس صحيحة، راهو تنجم تسمعنا وتنجم تلقا عنا اللي ما لقيتوش عند غيرنا راهو مش إرضاء لشخص رئيس الجمهورية، راهو إرضاء لقناعاتنا وللوطن وللشعب التونسي، ما يتفعالش معنا مش مشكل، احنا عنا مراحل أخرى تاو ندخلو للبرلمان ويولي عنا صوتنا وتاو نوصلو صوتنا، أكيد جدا بش نشاركو في الانتخابات".